Aug 28, 2012

Aw... Zoram, tho la ding ta che!

Tho la ding ta che
I hliam a dam e; 
I tha thum te a kiang e.

Hnutiang hawi lovin ram kal siam ta che, 
Khuavel i la chhing ngei ang.

Hausa an hausa tawlh tawlh a, retheite tan khawhawi a har tawh mang e. Ram hmangaihtu inti ten kil tin an hrut vel a. Bum tawk an vai ruai e, thiam thil an ngah, tawngkam thlum tin reng nen. Dawt sawi reng an hreh lo, pute sawi chu Pathian sawi emaw tiin kalna lam apiangah an tlangau pui chiam chiam a.

Sakhaw zalenna pawm siin midang sakhua chu sawi loh kan kohhran lo chu van ram kai tir loh kan tum lawi si. Sum duh luatah kohhran mit a del tan ta. Khawtlang hmasawnna aiin mimal hmasawnna kan thlir a. A thawh hnem thei theiin Nilai thupui an hawng an ti. Rethei daikil kara inkhawm thulh ngailo chuan kum bul atanga kum tawp thlengin tlar hnung a chan tawk a ni si.

Thalai rual ten kal ngaihna kan hre ta lo ve. Nu leh pa kan mawh, thiam thil puak chhuah tur reng kan hre tawh lo. Chep em em a inhriatna bak hi hriatna behhchhan kan mamawh tawh hek lo. 

Kan thluak min suk sak zo ta. Dik leh tha hria zawm peih lo kan pung tual tual a. Thiam em em hman ngaihna pawh hre lo khawp kan zi ta mur mur mai le. Thudik ngaina te tan hmun a chep a, dawt puarpawleng a in hampuarin tuallai kan leng e.

Zilhna kan ngai pawimawh hek lo. Vai haw hle siin sap leh khawchhak ngaihsanna in min run mek bawk a. Hnam bo zia an tih ang kha kan lo pai fur zuk nia. Hmanagaihna ai chuan deuh sawhna in kan thinlungah hmun a chang lian zawk a. 

Hrehawm tawrh kan peih ta lo. Kan mizia kan zuar lo chauh a ni ta e. Thiamna lei a lo ngaih takah chuan kei zawng thiam chi ka ni ta lo ve. Khawhar an rum, nawmsip bawl an pung tual tual.

Mahni tanghma bak ngaihtuah peih kan awm ta lo. Ka zawngin a ni ka ram kan tih tak ni. Rin tur an vang mawh tur an tam. Khawvel a zim, kan tlatna a zau tual tual. Kan khawhawi a zim tawlh tawlh thung si.

Thenawmte hmangaih thei lo hian khaw sarih do chu kan hlat a ni. Pathian thlarau tello hlimna um kan pung tual tual a. Pawl ten tum mumal an nei thei ta lo ve. Induhsakna a hluar tawlh tawlh a, kristian inti kan pung tual tual bawk.

Huan nei aiin ram nei kan tam a, in luah tur a van em em laiin luah sen loh luh tir tur zawng an kat nuk tho si. Khawilai berah hian nge kan kalsual tak tih hi ka ngaihtuah thin a. Sawi thiam a har ngei e. 

Kei zawng ka rilru hi a hah ve thin tih theih ka nei tlem si. Ngaihzawng sualthlu zo lo hian ram kalsiam ka sual thlu zo dawn si lo. Tih theih ka neih ve tawk mahni in phun phun tawh mai ang aw... 

Tho la ding ta che......

2 comments:

  1. Thil tha lo hi haw hlur mai ila, sawi chhuak ngam bawk ila, ngawih reng ai chuan a tha reng rengin ka ring ve tlat.

    ReplyDelete
  2. Ngaihzawng han nei la ram vei chu a reh ve mai ang..haha

    ReplyDelete