Aug 31, 2011

Zanin chu maw...

Zanin chu maw ka nau in min rawn phone a, ka u te inah a lenga naupang hoin min biak duh thu a rawn sawi a. Ti hian kan in be ta a...

A te ber Rotawta chu ka be hmasa ber a. Pawl li zirlai a ni. A hming Rotawta tih hi a tetlai a ma inphuah a ni a. Kan thenawm hnaiah reng reng Rotawta tih hmingpu erawh an awm hauh si lo. A ke a chian loh a vangin a kal thei lawk lo a, tawng lamah a ka a kal em em thung a.

"Rotawt, i dam em?
"Dam chiangkuang khawp mai!"
"Zanin i bialnu i rim lo em ni?"
"Min ban a. Apute, hei Lal a u te hian games khelh ve an phal lo va" a la rawn ti zarh zarh a.

I u te ka lo bia ang e kan tih leh aw tih kha a rual a a u chiah pawl ruk zirlai Sangmuana hian min rawn be ta a, "Bawihpui, enge in tih a?" kan ti a. Au Malsawma'n games a khel a, kei chu hla ka download mek tiin min chhang a. A ni hi chu rilru tha ngang hi a nia, a nau hian mitmeng ringawt pawhin a vel thei thin.

A tawp berah chuan api tupa chuam Malkawtawma chu ka be ta a. A ni hian kumin kumtir lamah khan district aiawhin science tih that lawmman Aizawlah a zuk dawng ve tawh a. Rei vaklo kan inbia a, a ni hi chu tawng tlem ngang hi a nia. "I til pawr aw ve tawh a ni maw?" tiin kan fiam hlut a. A ni chu sawi tur a hre tlem bawk a, mobile thar a awh thu min rawn chah a kan tawp ta a.

Ka ngaihtuah ta mai mai a. A upa ber pawh kum 13 vel a ni a. Mobile a te ber tih loh chuan an nei ve ve a. Internet pack nen an hmu ve ran mai si a. Enge internet ah chuan in tih thin ti a ka zawhna chu a te zawk chuan hla leh thlalak vel a download thin thu min hrilh a. A u zawk erawh chuan news a chhiar thin thu min hrilh a.

Ka awih lo han tih ngawt chu a chi si loh a. Ka u te nupa enin ka u zawk hi erawh graduate ve in a hawiharh viau a, computer erawh typing a thiam tawk tawk a. An pa hi sawrkhar driver siniar ve tawh niin zu bawih ah a tang ve a. An faten internet ah enge an khawih tih chu sawi loh, mobile atangin computer ah an thlunzawm thiam a ni tih pawh hriat ngaihna an la nei lo zui a. Computer ah internet kan pawt lo tiin min chhang a. Rilru a vak thui duh ngei mai.

Nikum krismas zawh hlim ka birthday zanah ka hriat ngai miah loh call ka dawng hlawl tawh a. (Ka phone pakhat zawk hi number ka dah lem lo na a, FB, Google leh Yahoo account hi ka sync avangin ka hriat lem loh number a awm nual a) Samson Tlau tih hi a rawn lang a. Ka rin dan chuan FB Tlau community vel a mi a nih kan ring ngawt a. Ka pick up duh ta lo a. A rawn tih leh thin avangin ka la ta a, "Happy Birthday" tih aw ka hria a, "Tunge aw?" kan ti hram a. "I u maw le" a rawn ti ta. Ka bo tawlh tawlh mai a. Mi pawh i hre nang e a rawn tih takah chuan ka u, missionary hi a lo ni a.

He ka number hi ka chhungte hnai deuh chauhin an hriat avangin ka bangbo teuh khawp mai. A hnuah chuan a fapa pawl 10 zirlai hian phone atangin a lo FB thin a lo ni a. Ka fapa a ni tih ka hrechhuak ve ta chauh a. A hnu feah a wall ah tleirawl pakhatin a tahiran sak a. Bawihte, kan va in luck hleih ve ka va ti a. "Apate, in hre lo der ang FB ah chuan " tih tawpa smiley hi message ka dawng a.

Heta ka sawi tum zawk a tak chu tunlai finna leh thiamna sang zelah naupang ho hi tawktarh tha tak an ni si a. Tha leh tha lo an la thliar hrang thiam dawn si lo va. Hman tangkai ngaihna hi an hriat ka la ring lo reng reng pek a kei hian. Hetiang ka naute ang hi an tam dawn si a awwwwww ka ti vawng vawng a. Peer pressure a lo sang tawh si, hum sual dai palh theihna kawng hi an tan hian a va han tam bik em!

8 comments:

  1. Kum 10 lek...tsk tsk.. An uar fal bik anilo mo, aizolah poh. Ka nau hi class 11 atangin a neih an phalsak ve ciah, nu leh pa bula wm a ni bok a.
    hman ni pon fb a mn lo add ve tu hmeichhe nopang te 98 ni maiin k hria, a piankum kha. A photo ah iva la nopang em2 ve, siannu k ti thruai a, a reh hmaks.. Hihihi

    ReplyDelete
  2. Ngaihtuah a tithui mang e. Chutih rualin i naute (tupate) chu internet khawih nachang an hre hma ka ti hle mai. An thiante atanga a nachang hria an ni ngei ang. A tha zawnga an hman erawh chuan mi bright tak an nih ka ring a, a chhe zawnga an hman erawh chuan chuti hlauh.

    I sawi tum example-ah ngai ta ila.. Ka friend-ah pawh kum naupang të të an tam a, thenkhat chu an chhungte siamsak a nih ka ring. He'ng naupangte hi an chhungte'n an thunun theih leh si loh chuan a pawi dawn mang e. Facebook leh internet hrim hrim hi kan hmang nasa tawh si a, thil tha lo tam tak a awm bawk nen. Fimkhur taka hman inzirtir leh nu leh pate paw'n fate mitmei deuh reng a pawimawh khawp mai.

    ReplyDelete
  3. A dik, ka sawi fo thin angin a upa lam pawh tunlai than dan hi man phak ve zel tum ila chumi mil chuan thil inhrilh thin hi a thain ka hria.

    Han sawi ta zel ila, ka fanu kum 5 mi hi anu aiin phone (touch screen) hi a hmang thiam zawk a, anu a zirtir fo ta mai. Kan ngaihtuahna tih chawllawl hi hlauhawm deuh a ni. Tar â emaw, upa lam deuh "Tunlai thil engmah i hrelo.." tih ang zawnga tawngkam an hman theih ni siam tum miahloh pawh a tha hle awm e hairehai

    ReplyDelete
  4. 'Kan khuaah Puitling Film' tih ziaktu blog hi ka tlawh khat ta hle.. :)

    I thuziak dan hi ka duh riau. Keipawh hi hnatlanga biak zeuh zeuh min ching...:)

    ReplyDelete
  5. tunlai khawvel hrethiam tur chuan internet/fb hi thiam ve a trul tawh tlat... chuti lo chu generation gap a awm nasa lutuk dawna ka hriat vangin ka lut lui ani. Ka naute thenkhat te lah hian senior tan fb hi siam ve se a tha ang min la tih khum zui... haha. I ziak tha e...Vaiva...

    ReplyDelete
  6. tha khop mai..keipoh ka u fate high school kal lai ten internet an khoih nasa lutuk a, mahse social networking site chu an la luh chilh lo tih ka hria a, ka hrilh duh bok lo a...fb leh orkut etc vel ah hian naupang te te zak thei lo deuh2 an tam si a, ka ngaihtuah ve thin khop mai.

    ReplyDelete
  7. I poat chu a thain ngaihtuah zui neuh neuh tlak a nih hi.

    Hmanni khan kan thianpa pakhatin internet chungchang min zawt a, e-mail account hawn dan leh FB chungchangte ka hriat ang ang ka lo hrilh ve nual kha, ka hriat tlem tehreng nen :-) "Ka faten neih ve an duha an sawi fo maia, hetiang hi hriat ve vek ka duh,enge an tiha an khawih tih te kan hriat ve zel theih loh chuan nakinah a buaithlak ang" a ti. A dik khawpin ka ring.

    ReplyDelete
  8. Naupang ho ti ti mai mai atang pawhin zir tur tha tak mai i han chhawpchhuak thei zel hi chu i thu thiam mai bakah ngaihtuahna hmang mi tak hi chu i va ni em..!!! Ngaihtuahna i hruai thui mange.

    ReplyDelete