Aug 5, 2011

A rem si lo (Part I)

Keimah in khumah chuan ka let ka let a, “Hei hi em ni hmangaihna chu?” tiin. “Hmangaihna hi a lo awm tak tak em ni?” tiin keimah leh keimah chu ka han in zawt a. Chu zan thiang reh tak chuan chhanna reng a rawn phuh chhuak si lo.

Ka mitthla ah chuan hun kaltawh te chu a rawn inlan chhawk sek a. Video Cassette bal zet tawh ang maia fiah lo ruai hian a sakhmel chu a liam leh thin a. Ka mut a chhuak hlawl lo a ni.

A mak teh e. Chutia ka leh ka leh lai chuan suangtuahna nen nunhlui ramah ka kir leh ta a…

“Rel bal zet ah chuan a hmel hmuh chak em avang chuan thutna pawh changlo in ni thum zet ka chuang tawh a. Guwahati luh dawn ruai a vai ho Aizawl ticket min zawrh pawh chu ka hrelo lui der tlat a.

Chawhnu herah chuan Guwahti rail station-ah chuan a in hnuk lut bauh bauh a. Ka rilru erawh ral leh lam mawi takah a thlawk delh delh a. Station a rel din rual chuan rang mangkhengin ka petek chhuak nghal a. Puakphur ka mamawh lo va, zang vah hian ka thlenna tur lam hotel panin ka in ak chhuak ta a.

Vandana Hotel lam rilru ah a lang lo va. Hmun biru ve deuh lai a tlem a mawihnai deuh lai hotel chu ka pan ding ta vat a. Ka tan leh a ni tan tiin single room pahnih chu ka booked ta a.
Ka inbualfai var a, kei leh kei lo angin nghah chhungin beauty parlour ah facial an ti emaw ni te kha kalo ti ve khawng khawbai a.

Kan khaw mobile a thawh tawh loh avangin PCO ka pan a. Huphurh deuh si chak deuh bawk si hian ka han thai vir pawp pawp a.

“tring.. tring.. tring..”

A tawpah chuan a rawn pick up ve ta hram a. Sawi mai tur ka hriat loh avang chuan “Khawiah nge i awm?” kan ti ngawt a.

“I rawn thleng tawh em ni?”

“Aw, thleng tawh e. Chuan…”

“Aaa cancel mai i la…..”

Ka hamhaih bawk si chuan, “I tih te chuan i thu vek a lawm” kan ti thla ngawt a.

Mahse, “Eng kawr nge ka rawn hak ang?” tih chuan min thlamuan ta huai a.

“Ruaka I rawn kalloh chuan a tawk mai” kan ti thla leh ngawt pek a. Ka thiam loh a ni lo. A thawmhnaw hak kha pahnih chauh ka la hmu miau a lawm. Han thlang leh tur chuan a rawng leh design pawh ka hre tawh hauh si lo.

“Tun atanga darker 3 ah chiah chiah ka rawn thleng ang, ka rin ang i lo nih tak tak chuan min hre nalh mai ang” a rawn ti ta a.

Engtin nge ka lo hriat ngawt ang? A thlalak min rawn thawn hnuhnun ber pawh kum 4 lai a liam tawh si a. A lo danglam viau ang em?

Huphurh rilru tak chak ang reng bawk si chuan darkar thum chhung tawm ngawt ai chuan tiin Paltan Bazaar ah chuan ka tei chhuak ta a. Mak tak maiin vaiho tei vel pawh chu an hmeltha ta riau hian ka hria a.

Behliang mun hun vel anih chuan Hotel lamah ka kir leh ta a. E-mail atang chuan a thlalak hlui ka neih ang te chu kan print leh hnuhnawh a. Khuain tlai lam a pan zel a, a hnim deuh ruai a. Unau hmel hai a nih meuh chuan rual mal a tla ta phauh phauh mai a.

Hun ka han en a, darker thum rik nan minute sawm panga chauh a awm tawh avangin front office ah trunk call ka zuk dil ta a.

A tlang lawk thei lo a, ka lungphu chu a rang tual tual mai a. A tawpah chuan a tlang ve ta hram a. “…aw.. minute sawm velah… ka huphurh e!”

Keipawhin ka huphurh ngei mai. Darthlalang hmaah ka han in en leh te te a, lobby panin ka chhuak ta a. A vawt ka tih vang pawh ni lemlo chuan ka chhungrilah ka khur ru der der a.

Hotel kawtah chuan rei vaklo ka ding tihah chuan sumo hi a rawn ding a. An han chhuk sap sap. Thinphu dep depin ka lo thlir reng a. Ka dinna lam kawngkharah chuan vainu pawr ve tak hi a rawn chhuk a. A ni kha chu ni theiin ka hre bawk si lo.

A hnunga bungraw hlangthlak lo dawng tur ka va hmu a. A ni… hnung lam atang pawhin hai rual a ni lo. Tichuan….
…………………………….to be continued

11 comments:

  1. Nang nen hi chuan thil inrem hi a awm thei hrim hrim a mi?

    ReplyDelete
  2. Thin a va phu nasa dup dup em!! Tren tren.....

    ReplyDelete
  3. hotupa goes romantic....huhu
    part 2 lo chang nag ngaihnawm dawn khawp...


    -Sihal

    ReplyDelete
  4. I ngeiawm hle mai. Hemi hnu hretah hian part-1 hi titawp ta che.. :)

    ReplyDelete
  5. part 2 pawh ka hre teuh kei chu..hehe

    ReplyDelete
  6. Maisawk an part 2 a hriat chuan ka hriatloh bikna chhan tur ka hrelo.:P. Chhunzawm vat teh tren tren...

    ReplyDelete
  7. Ka chhiar laia ka rilru a lo lut chu 'ku Vaia hian novel ziak sela chu ka va han lei dawn chiang em' tih a ni daih.

    -triplestar

    ReplyDelete
  8. Chhiar zawm chakawm. Non fiction non fiction i tia, fiction lam i kawh vu khi. Novel ziak rawh, i thiam dawn chiang. Writer tha chu reader te suspense taka min dahthiam hi. Zawhna pakhat - Blog ah ka vawikhat luhna nia. Commentor profile select dan minlo hrilh please

    ReplyDelete
  9. Min la chhang lova....please. Blog tih vel, internet kaihnawihah chuan mimawl ka nia.

    @HELP

    ReplyDelete
  10. Anonymous in va tam ve? :P Non fiction non fiction kan tia... fiction khawiah nge kan ziah a? :D

    @Anonymous, zawhna pakhat chuah zawt a awm bawk a a hrethiam mai ang chu maw?... Comment box hnuai a Comment as.. tih ah khan profile i select thei ang. Google acount nei turah ka ngai ngawt che a. I google ID khan i comment thei e IDENTITY i duh a nih chuan.

    ReplyDelete