Jul 22, 2011

Sipaiah ka intlar ve a...

Naupan lai (ti ve khanglang i la!) chuan silai hi mipa naupang kha chuan kan han lawm thei khawp mai a. Sikul banah kan 'in theng kah' thin a. Bihrukna atangin chal akn ti lawr dek dek a, "I thi" an rawn ti lauh mai a. Pil zak pahin "ka pil hman!" kan han ti hram thin kha tunhnu hian a lo ngaihawm ta ngawt mai.

Silai sawi takah chuan mi dilah kan cheng ru a, air gun (.22) hian a neitupa hian min tin a. Kan han hlau mai mai khawp a. Kan thianpa pakhat tuichen thiam vak lo hi a thuk lam panin a lut phei ta mai. "Ka thaw thei .. ip..." a tih dawn meuh chuan dil neitupa tuiah a zuang thla vat a, a va chhar ta a. Keini erawh remchanna leiin hlau bak lengin kan tlan chhia a. Tlai lamah inlamah kan inhmu ta tham tham a.

Tuichen sawi takah chuan Champhai Holy Cross sikul ho hian hostel a awm te tan dil thianghlim tak an nei a. Chawlhni hian kan cheng ru thin a. Kan zinga rual u ve tawh tak hian hostel tleirawl ho hma ah chuan kekawrte phelhin a 'mihur' tui hleuh zak zak mai a. Chutih lai tak mai chuan an Brother a rawn tlan thla ta mai. Midang zawng kan tlan chhe hman a. Tui a cheng ber erawh tlan chhuah chuan a ruak ve laklawh tawh bawk si. An in man chiang teh a sin.

A thupuiah lut dawn tawh i la. Heti hi a ni a, pawl sawm kan han zo ve a, kan zirlai pui pakhat chu sipaiah hian a tui em em mai a. A intlar deuh reng mai a.

A thlawn a intlar theih na na na chu tiin tum khat chu lawng sipaiah ka va intlar ve ta a.

Written chu kan zo mai a, result pawh objective a ni bawk a a chhuak nghal mai a. Chawhnu lamah chuan medical kan nei dawn ta a. Mizo keimah chauh ka tling a. Tichuan, kekawrte nen kan ding ta thau mai a.

Lawng sipai dawktawr pa chuan a mal te te in a rawn en fel a. Ka zawn a rawn thlen chuan a kut zungtang chu hnuai lamah a ti bu nghauh a, "Phelh rawh" a tihna ni ah ka ngai ve mai a. A kutkawr bun chu an siam tha te te a, "Pull back" a ti leh a. Ka ti ve leh mai a.

"Khuh raw" a ti leh a. Ka khuh kharh kharh a. Ka nuih a za ta tlat mai a. Daktawr pa chu a thin rim ta a. Min hau ta hrep mai a. Ka chip ve tak reng a vang chuan min kal pel ve ta a. Ka piah chiah a ding Naga pa chu a han ti ve leh a. Ka va melh ru a. Ka insum zo ta ngang lo a, ka nui ta vak mai a. Rum tawkin min rawn melh a "Nang aiin a*** lian!" a rawn ti kha ka nuih a za tawlh tawlh ta mai a. Min hnawt chhuak ta a.

Physical exam an ti ve a. Panga la tling zingah khan hun tiam chu sawi loh tlan thleng hlei thei kan awm lo a. Mahse midang an awm miau si lo va. Ka tling ve leh ta a. Hemi tum hian keimah chauh Mizotling ka awm a, ka zawm ta lem lo.

Tum hnihna....
Tin heti hi a ni a. Tlai khat kan sikul bang haw lam hi AR lammual ah khian sipai an lo la leh mup mup mai a. Hei ve thung erawh khawmual sipai tur a ni an lak ni. Thianpa sipai ngaisang deuh pa chuan "Hawh u i zuk in tlar ve ang u" a ti ngawt mai a. Pali kan ni a. Kan zuk thlir a, clerk tur khan kan zuk intlar ve leh ringawt mai a sikul uniform nen.

Khawmual sipai chu an dan a lo dang a. Intlansiak a beih hmasak tur hi a lo ni a. Uniform nen chuan kan in tlar ve a. Lammual bial hian hrui an hling a. Mihring pawh an tam khawp mai a. Vawi li tlan hel tur ni ta in ka hria. Vawi khat kan tlan chhuah chuan sipai tan chak ber chu a thal ta tawp mai a. Ka la tlan ve zel a, vawi 3 na ah chuan thian dang 2 te pawh chuan min peih loh san ta a.

A tawpna tur chu ka tlan mek a, ka lu hi a hai nasa tawh khawp mai a. Chhim lam goal ban ka tlan pel ta, ka leh pel ve teuh mai . Ka tlan thleng ve dawn chiah tih ah chuan sipai lo ding chuan an hrui zen ken chu an lo pawt chho thut mai a. Ka tling lo chiah chiah hi a lo ni a. Ka tlin teuh em avang chuan nge ka chauh em vang pawh ka hre tawh lo, ka mu lui ta tlat mai a. Sipai 2 in min zawn chhuah lai erawh ka la hre vuai vuai a. Hei erawh ka tla hma ngei mai.

Tum thumna....
Pawl sawmpahnih ka zirlai hian hna hi ka zawng ve nasa hle mai a. Future Vision an tih ah te khan kan thawk ve zak zak a. Exam leh interview theih kha chu thelh kha ka tum lo hrim hrim a. Bula mi ten an zir a niang Airmen exam tur chuan form ka thehlut ve leh ta a (zawm ka tum pawh a ni hran law!)

A hun a lo thleng a. Written kan exam lai chuan ka bula thu pa hian a rawn entawn a, ka zo tawh na a ka la thu reng a. Vanduaithlak takin min man ta hlauh mai a. An squadron leader pa chuan paper pawhthlak leh min ben an rual thuai mai a. Thlawkna sipai ho chu an va sual mai mai ka ti rilru ngam tawk a.

Ka paper a pawtthler a, a thar min pe a. Mahse, hun kha darkar chanve pawh ka nei tawh lo va. Ramhuai speed chuan kan ziak zo ve leh hman hram a. Result an rawn puang a, ka tling ve leh ta hlauh mai a. Medical neih a lo hun leh ta a.

Airforce ho tih dan chu a dang khawp mai a. Room khatah hian bang hawi zawng hian kekawrte nen kan ding thap mai a. Mawng hlui deuh deuh leh thing ve tak tak hmuh erawh chuan ka zam ta bik em lo va. Khatiang a in check up kha tun thleng hian ka nuih a la za nia maw le.... :D

Kha mi tum khan intlansiak lam reng reng a awm ka hre ta lo. Boruakah chuan tlan a har deuh a niang. Tin, khami tum khan Mizo paruk kan tling a. Pakhat chauh khan a zawm ta in ka hria. Tun hnuah Port Blair lamah a awm thu ka dawng.

Intlar vawi li-na....
Hemi tum zet hi chu tum vang pawh ni tawh lo in NDA exam tura ka inpuahchah lai a ni a. Thiante lawng sipai exam tur ka kalpui a, application pawh ka submit ve lo va. Mahse thiante exam lai chuan a rawn la tupa chuan min fuihpawrh ta a. Hun tawp dawnah chuan ka va thu ve leh ngawt a, ka tling ve leh ta mai a. A tukah document te ka keng chawp ta ruai a.

Medical exam pawh ka hnehsawh tawh khawp mai a. An sawi hma hma khan ka lo Adama suit hman vel a, a in dawt dan pawh ka lo sawi lawk zung zung thei tawh a :P

Hemi tum hian Mizo pali kan tling a. Kan zavaiin kan zawm ta dial a. Tum loh deuh mai sipai lubawk ah kan tang ta reng chu a nih hi :P

A tlang kawmna...

Eng vanga he thu hi ziak vak nge ka nih pawh ka hre lem lo. Ka pa hian sipaiah i tling thei lo hrim hrim min ti tawh a. Mahse, thlawhna leh lawng sipai ah chuan ka tling ve chiang kawp mai (lawng sipai phei chu vawi hnih :P) Khawmual sipai erawh thiam lam en hmain tlanchhiat chak leh chak loh min tih tir avangin ka tling zo ta lo va ... ha ha ha..

Ka thiante ho hian ka tlin hlim hian kan thenawm pitar hnenah " A ni chu lawng sipai te chi ah a tling a, zu te chi a dawng ang a, hlawh pawh a te chi..." an lo ti a ni awm a. Zawhna ka dawng nghe nghe! :D

Tin, heti hi a ni a, hun leh kumte an liam zel a; tun atang a kum li hnuah chuan pension hlawh ka lo la ve thei dawn tawh reng hi a lo ni a...

.....auh ruai ka nuam thin e nunhlui zamual liam hnu...

(Note: Sipai tan chak ka tih pa khian a chhiar ngei ka beisei a, a comment ka lo nghak nghe nghe. Tunah Army ah tangin Haiti lamah UN Peacekeeping Force lamah a awm ni awm tak a ni. Ka sipai hnu ah a rawn training zo hi Aizawl a ka u te inah a rawn leng a, ti ti a thiam bawk a a haw meuh chuan ka u chuan "I thianpa chu sipai tak tak a nih kha. Silai te hi in kap ve ngai lo vem ni?" min ti hlawl mai! :D)

16 comments:

  1. A naupang thu em mai

    ReplyDelete
  2. A ngaihnawm reuh. Hotupa, Sipaia intlar chu i sam ve hrim hrim a nih hi! :D

    ReplyDelete
  3. Sipaia intlar pawh chu ivan hnenhsawh deuh ve! Medical-ah chuan an kuai thle lawl lawl mai thin ani lawm ni :-)

    ReplyDelete
  4. A ngaihnawm hle mai. Nupui i neih hmain i pension hman der dawn a ni maw..:-P1.
    Mi hi kan va inang lo em! Tling reng chung pawha zawm loh tawp mai chu. Mahse, in hun lai chuan sipai hlutna chang pawh an la hre lo va..:-P2.
    Thlawhna leh lawng sipaiah chuan pumruaah an teh vak lo a ni maw.. I tling mawlh mawlh mai. :-P3.
    Intheng kah te kha in lo ti ve reng elo? Sikul bana tuikhuaha chên te kha in lo ti ve reng elo? Sephung-ah hian mihring êk-a mi nge ran êk-a mi chak zawk tih pawh i hre hnehsawh ngawt ang. :-P4.
    Han pension të të la, sipai interview tawh lovin makpa interview han bei ve thung tawh teh. Mahse, sipai atana i tlin ang zung zung kha chu a ni tawh dawn lo a ni. :-P5 & last :-P.

    ReplyDelete
  5. A ngaihnawm mai mai mange, i sam ve hle mai maw, intlar chu,.. i ziak tha khawp mai

    Ka Body hian sipai a 'phu' ve lo :)

    ReplyDelete
  6. Ngaihnawm ti takin ka chhiar chhuak dap mai. Kan hostel awm ve laiin doctor hma ah chuan kan phawrh ve sap sap tawh alawm, nuihzat thlak duh khawp mai. Doctor room atanga rawn chhuak apiang kha kan khi chhuak thaw zel

    ReplyDelete
  7. Ka chhiar chhuak dap a, mahniin ka nui ker ker mai. A ngaihnawm si, i ziak nuihzatthlak thiam bawk si. Hotute nge nge, thuziak lamah chuan kan lo khan lo deuh che chu anih hi.

    ReplyDelete
  8. A ngaihnawm lutuk, ka nui huk huk mai. I la tling hma deuh a ni. A vawi 7 na velah tling la tun ai hian a la ngaihnawm tur :-)

    ReplyDelete
  9. Ka chunga mi khi ka thlawp e. Ngaihnawm ka ti a niang a tawi ka ti tlat

    ReplyDelete
  10. Daih mai a! Engvanga Lawng sipai zawmlo nge i nih hriat a va'n chakawm ve le. Sipai intlar ka hriat tawhah chuan ila samlam ber awm e.Zaithiam pakhat pawh Recording Studion-ah a awa thun dawn a,a duh aiin a hla a lo tawi deuh a ni ang chu, studio chhungah a phuah belh an tih te pawh min tihrechhuak hial.Ngaihnawm khawp mai

    ReplyDelete
  11. Holy Cross dila chenga Brother te hlaua tlanchhe ve zak2 thrin i nih chuan ka van hre chak che... Keipawh kha ka tlanchhe ve ngei mai ah.. :)

    ReplyDelete
  12. I va tling thei bik ve mawle.. hmel lam an en loh zia pawh nangmah ah hian a chiang hle in ka hria.
    Pension te i sawi tak.. i pension hnu ah chuan sipar ration ah a senchi i dawng ve thei dawn em.. theih dawn chuan inkawm deuh chawt ila a thra ang.

    ReplyDelete
  13. I fit thawkhat aniang e, i tling i tling mai hairehai.

    "Tin heti hi a ni a." lai tak khi i ti Bible vel vei :D

    ReplyDelete
  14. In va zahawm hlawm liam liam ve! Chhiar chiang lo te pawh kan awm nawk tho a. Min chawh phur viau chuan Sipai training dan ka la rawn chhawp ang che u :D

    ReplyDelete
  15. Ngaihnawm hle mai. Thenkhatin an beih ve hle a an tlin theih loh laiin nang zawng i awlsam hle mai

    ReplyDelete