Dec 28, 2011

Kum hi a ral lek lek tawh a...

Kum sawm leh kum khat zet vai ramah ka tei bo ve ta. Kum nga zet hetih hun hma hian Zawlkhawpuiah zirna run belin ka awm tawh bawk. Vawiin ni hian kum sawmthum (Mizote kum chhiar danin) an tih ang hi ka lo thleng ve ta a. Tawngkam thleh mawi ka tum lo va, ka pehhel dawn hek lo.

Tin, heti a nih si chuan kan khua ka chhuahsan laia aia u deuh ten fa sen awih pahin, "I la rawn rim thin ang a" an tih fiamthu kha atakin a thleng ti tih dawn der mai hi a lo ni a. Mahse, ka rim lo ang *evil green*

Hun hi a va ral chakin kum hi a va ral teuh tawh tak em ve aw... te ka ti vel mai mai a. Mifate chuan IAS te an pass a, doctor te an ni a, kei ve erawh chu angai ngaiin siamtu siam dan ang deuh thaw in til then na lam lamah ka la then ve mai mai chu a ni si a. Kum hi a va ral chak teh lul em!

Ngaiteh, kum kal ta ah chuan zu ka in ve zeuh zeuh va, zial ka zu a, kuhva ka ei ve thin. Kum te an lo ral ve zel a. Sipai lubawk ah ka tling ve ta hlauh mai a. Chutih hunlai chuan lehkha zir hi ka tui thar leh ta thut mai a. Zial chauh lo chu ka ban san ta a.

Chuta tang a kum sarih a liam hma loh chuan Chawlhni tlai tin Bar-ah Maaza ka in ve thin. Hetih hunlai vek hian sap ram hmun hrang hrang ka tlawh ve a, thianghlim takin a ngaite te in ka rawn haw leh thin.

Hre rawh khai, kum sarihna a lo liam a, kum riatna a lo zawh dawn meuh chuan beer no khat hi ka dawm ve ta ziah mai a. Kum sawm a lo nih meuh chuan Mild beer um khat hi ka quota ah ka pawm thei ta mai a. Vai thian ten "Mr One Kingfisher Premium" min ti fiam ta fo mai.

Hetih hun chhung zawng erawh hi chuan ka sipai quota an tih ang kha ka la ngai chuang hauh lo a. Unau zu in mite nei ve mah i la ka hawn ngai hauh lo. Mizoramah khap a ni si. Midang in tur a hawn kha sual a ni ta daih mai a.

Kum a lo liam leh a, 2011 krismas haw tuma ka inpuahchah meuh chuan "Khaw'nge, zu chhia an in tho tho, kumin chu i hawn sak ve teh ang khai" tiin ka in hnawh puar ve a. Vanduaithlak tak maiin Chhandamna Camping lamah nun thar changin an lo in loh lai tak a ni si. A ngai ngaiin ka kawl ta reng a.

Mahse, mahse... ka tan chuan kumin krismas erawh krismas thlamuan thlak ber niin rui hmel hmu hauh loin inah masi ka hmang liam ve ta a. A lo va han nuam ngai em.... zan dar sawm leh pahnih biakin dar a rawn inkhawng ri a, an lo la haw loh hi chuan khang zan te kha zan nghahhlehawm a va ni lo thin tak em! Tum thum vai ramah masi ka hman phah a, ka haw chhunah lah thiante bulah kal ngam lo in u te haw hun kha ka lo nghak thin a.

Keima tana ka beer hawn ve pawh chu in tul ka ti ta bik lem lo a. Vawiin ni ah hian ka hlim em avangin ka rawn theh then ve che u a ni e. Kumthar chibai vek u le!

Oct 26, 2011

Inkhualtelem

Ka thianpa khan GI Joe kha a nei ngah thei khawp mai a, chawlhni inkhawm banah khan ka va han kawmngeih thei tak e awwwwww ! :)

Inkhualtelem hi han sawifiah vak angai hran lem lo va. A mah hian a chiang tawk em em mai a ni han ti dawn i la exam ni ta se, mark ka hmu tlem dawn bawk si a, khaw nge i han sawi zau dawn teh ang hmiang.

Zanin chu kan thianpa haw tur kan zan hnih thlahna a ni ta. Nizan ah kan thlah rei lutuk a, tukin zingah rel a lo va um ni awm tak a ni a. A hmuh hman awm chhun rel hnung a X ti inziak chu ui tak chungin a thlir liam ta a. A um phak tak lo vah chuan thlawhna tum hmunah te a lo va tei raw lai a, ticket a chan chuan loh avang a rawn let leh hi a ni a.

Ka ban tlai deuh avangin ka mobile ka han tih nun meuh chuan thuthawn a lo awm a. Ka han chhiar a, "Zanin chu in thlah leh i la" a rawn ti heu mai a. Khaw nge thiante haw tur chu Zoram ngaih a kiam mahna tiin ka in hawl chhuak leh ta a.

Hmaaan a Kaartunlawma ka tih thin in ah khan ka va lut hlawl mai a. Vur siamna khawl chungah hian Bus te, Rel lu te, Kangthleh mawtawr te leh helicopter hi a lo in tlar a. Chung te chu nizan lamah hawn tura a lei a thun theihnghilh te an ni a.

Ngawi reng chuan Bus chu ka han start vu hluah hluah mai a, nula awm ta lo chu kan thianpa pakhat hian "Kei helicopter pilot" a rawn ti var a. A helicopter a tih nun hma chuan a dang leh chuan kangthelh mawtawr hi a rawn hum chhuak vat a. A la bang awm chhun rel chu hmanhmawh mangkhengin a rawn chuh ta vat a kan thian la bang ve bawk chuan...

Tichuan inkhualtelem chu kan tan a ni deuh der mai a. Patling zahmawh thankin thuau tawh awmkhawm chu kan vu ta hlurh hlurh hlawm mai a. Kan inkhualtelem theme chu time machine hi a a ang ta ber a.

Pakhat chuan Rel chu a han ti "dak thlarh dak thlarh" a, Kei chuan dawhkan sirah chuan ka bus chu ka han ti vu hluah hluah a, kawngkhar chu ka han hawng zau deuh sauh a. Kan thianpa rel man hman lo bera chuan hmanhmawh em em hian min rawn pan a, mahse ka bus neitupa hnenah ka duty ka zo tawh ka lo ti lak lawh tawh si a, ti chuan a ni mangang chuan helicopter pilot chu a han phone a.

A ni chuan rang em em in kan dinna chungah chuan a rawn vir ta vut vut a. Ka thianpa chuan a tum pawh nghak lo a han zuan chhoh mai hi a tum a. Vanduaithlak takin helicopter chu a alh ta puat puat mai a. Kei chuan a rang thei ang berin kangthelh mawtawr chu ka han fawn a.

Kangthleh mawtawr chuan tui hi a lo pai reng reng lo mai a. A va chawi chawp a, a rawn thlen meuh chuan a lo kang zo ti tih tawh a. Thelh tur a bar a awm tawh loh avangin a tui chawi chu dawhkan ah chuan a han sem dan dan a.

Kan thianpa lunghnur lutuk indawm kun reng lai chuan Zoram lam atangin phone a rawn ri ral ral a, chhan zai reng a rel thei ta lo. "Pick up rawh" tih pawhin signal a chian loh thu chiah chu ka chhanna dawn chhun a ni ta.

Chutih lai tak mai chuan a in nei tupa ber chuan chawhtawlh a rawn hunga, a chhungah tui a rawn chhung khat puau mai a. Tah chuan bel kum phit phet te reuh te hi a rawn dah lang ta va va mai a. Thirfian pathum a rawn chhawp bawk a, "Kha Sri Lanka lam atangin kualin Tlabung lamah kual tawh mai rawh" an ti mai chu(h)!

Kan inkhualtelemna bungrua zawng zawng chu bag chhungah an lut ta dial mai a. A hrilh hai thlak duh phian mai a. "Tea set zawng zawng nen a bang thin" tih tet lai a mi te pawh min ti hre chhuak ta rum rum a. Naktuk zingah chuan a haw thei tawh em ang chu maw ti chungin chaw kan ei ta hrek hrek hlawm a.

Tichuan kan inkhualtelem chu kan lo zo ta a, mahni riahna lam panin kan tin darh ta a...

Aug 31, 2011

Zanin chu maw...

Zanin chu maw ka nau in min rawn phone a, ka u te inah a lenga naupang hoin min biak duh thu a rawn sawi a. Ti hian kan in be ta a...

A te ber Rotawta chu ka be hmasa ber a. Pawl li zirlai a ni. A hming Rotawta tih hi a tetlai a ma inphuah a ni a. Kan thenawm hnaiah reng reng Rotawta tih hmingpu erawh an awm hauh si lo. A ke a chian loh a vangin a kal thei lawk lo a, tawng lamah a ka a kal em em thung a.

"Rotawt, i dam em?
"Dam chiangkuang khawp mai!"
"Zanin i bialnu i rim lo em ni?"
"Min ban a. Apute, hei Lal a u te hian games khelh ve an phal lo va" a la rawn ti zarh zarh a.

I u te ka lo bia ang e kan tih leh aw tih kha a rual a a u chiah pawl ruk zirlai Sangmuana hian min rawn be ta a, "Bawihpui, enge in tih a?" kan ti a. Au Malsawma'n games a khel a, kei chu hla ka download mek tiin min chhang a. A ni hi chu rilru tha ngang hi a nia, a nau hian mitmeng ringawt pawhin a vel thei thin.

A tawp berah chuan api tupa chuam Malkawtawma chu ka be ta a. A ni hian kumin kumtir lamah khan district aiawhin science tih that lawmman Aizawlah a zuk dawng ve tawh a. Rei vaklo kan inbia a, a ni hi chu tawng tlem ngang hi a nia. "I til pawr aw ve tawh a ni maw?" tiin kan fiam hlut a. A ni chu sawi tur a hre tlem bawk a, mobile thar a awh thu min rawn chah a kan tawp ta a.

Ka ngaihtuah ta mai mai a. A upa ber pawh kum 13 vel a ni a. Mobile a te ber tih loh chuan an nei ve ve a. Internet pack nen an hmu ve ran mai si a. Enge internet ah chuan in tih thin ti a ka zawhna chu a te zawk chuan hla leh thlalak vel a download thin thu min hrilh a. A u zawk erawh chuan news a chhiar thin thu min hrilh a.

Ka awih lo han tih ngawt chu a chi si loh a. Ka u te nupa enin ka u zawk hi erawh graduate ve in a hawiharh viau a, computer erawh typing a thiam tawk tawk a. An pa hi sawrkhar driver siniar ve tawh niin zu bawih ah a tang ve a. An faten internet ah enge an khawih tih chu sawi loh, mobile atangin computer ah an thlunzawm thiam a ni tih pawh hriat ngaihna an la nei lo zui a. Computer ah internet kan pawt lo tiin min chhang a. Rilru a vak thui duh ngei mai.

Nikum krismas zawh hlim ka birthday zanah ka hriat ngai miah loh call ka dawng hlawl tawh a. (Ka phone pakhat zawk hi number ka dah lem lo na a, FB, Google leh Yahoo account hi ka sync avangin ka hriat lem loh number a awm nual a) Samson Tlau tih hi a rawn lang a. Ka rin dan chuan FB Tlau community vel a mi a nih kan ring ngawt a. Ka pick up duh ta lo a. A rawn tih leh thin avangin ka la ta a, "Happy Birthday" tih aw ka hria a, "Tunge aw?" kan ti hram a. "I u maw le" a rawn ti ta. Ka bo tawlh tawlh mai a. Mi pawh i hre nang e a rawn tih takah chuan ka u, missionary hi a lo ni a.

He ka number hi ka chhungte hnai deuh chauhin an hriat avangin ka bangbo teuh khawp mai. A hnuah chuan a fapa pawl 10 zirlai hian phone atangin a lo FB thin a lo ni a. Ka fapa a ni tih ka hrechhuak ve ta chauh a. A hnu feah a wall ah tleirawl pakhatin a tahiran sak a. Bawihte, kan va in luck hleih ve ka va ti a. "Apate, in hre lo der ang FB ah chuan " tih tawpa smiley hi message ka dawng a.

Heta ka sawi tum zawk a tak chu tunlai finna leh thiamna sang zelah naupang ho hi tawktarh tha tak an ni si a. Tha leh tha lo an la thliar hrang thiam dawn si lo va. Hman tangkai ngaihna hi an hriat ka la ring lo reng reng pek a kei hian. Hetiang ka naute ang hi an tam dawn si a awwwwww ka ti vawng vawng a. Peer pressure a lo sang tawh si, hum sual dai palh theihna kawng hi an tan hian a va han tam bik em!

Aug 5, 2011

A rem si lo (Part I)

Keimah in khumah chuan ka let ka let a, “Hei hi em ni hmangaihna chu?” tiin. “Hmangaihna hi a lo awm tak tak em ni?” tiin keimah leh keimah chu ka han in zawt a. Chu zan thiang reh tak chuan chhanna reng a rawn phuh chhuak si lo.

Ka mitthla ah chuan hun kaltawh te chu a rawn inlan chhawk sek a. Video Cassette bal zet tawh ang maia fiah lo ruai hian a sakhmel chu a liam leh thin a. Ka mut a chhuak hlawl lo a ni.

A mak teh e. Chutia ka leh ka leh lai chuan suangtuahna nen nunhlui ramah ka kir leh ta a…

“Rel bal zet ah chuan a hmel hmuh chak em avang chuan thutna pawh changlo in ni thum zet ka chuang tawh a. Guwahati luh dawn ruai a vai ho Aizawl ticket min zawrh pawh chu ka hrelo lui der tlat a.

Chawhnu herah chuan Guwahti rail station-ah chuan a in hnuk lut bauh bauh a. Ka rilru erawh ral leh lam mawi takah a thlawk delh delh a. Station a rel din rual chuan rang mangkhengin ka petek chhuak nghal a. Puakphur ka mamawh lo va, zang vah hian ka thlenna tur lam hotel panin ka in ak chhuak ta a.

Vandana Hotel lam rilru ah a lang lo va. Hmun biru ve deuh lai a tlem a mawihnai deuh lai hotel chu ka pan ding ta vat a. Ka tan leh a ni tan tiin single room pahnih chu ka booked ta a.
Ka inbualfai var a, kei leh kei lo angin nghah chhungin beauty parlour ah facial an ti emaw ni te kha kalo ti ve khawng khawbai a.

Kan khaw mobile a thawh tawh loh avangin PCO ka pan a. Huphurh deuh si chak deuh bawk si hian ka han thai vir pawp pawp a.

“tring.. tring.. tring..”

A tawpah chuan a rawn pick up ve ta hram a. Sawi mai tur ka hriat loh avang chuan “Khawiah nge i awm?” kan ti ngawt a.

“I rawn thleng tawh em ni?”

“Aw, thleng tawh e. Chuan…”

“Aaa cancel mai i la…..”

Ka hamhaih bawk si chuan, “I tih te chuan i thu vek a lawm” kan ti thla ngawt a.

Mahse, “Eng kawr nge ka rawn hak ang?” tih chuan min thlamuan ta huai a.

“Ruaka I rawn kalloh chuan a tawk mai” kan ti thla leh ngawt pek a. Ka thiam loh a ni lo. A thawmhnaw hak kha pahnih chauh ka la hmu miau a lawm. Han thlang leh tur chuan a rawng leh design pawh ka hre tawh hauh si lo.

“Tun atanga darker 3 ah chiah chiah ka rawn thleng ang, ka rin ang i lo nih tak tak chuan min hre nalh mai ang” a rawn ti ta a.

Engtin nge ka lo hriat ngawt ang? A thlalak min rawn thawn hnuhnun ber pawh kum 4 lai a liam tawh si a. A lo danglam viau ang em?

Huphurh rilru tak chak ang reng bawk si chuan darkar thum chhung tawm ngawt ai chuan tiin Paltan Bazaar ah chuan ka tei chhuak ta a. Mak tak maiin vaiho tei vel pawh chu an hmeltha ta riau hian ka hria a.

Behliang mun hun vel anih chuan Hotel lamah ka kir leh ta a. E-mail atang chuan a thlalak hlui ka neih ang te chu kan print leh hnuhnawh a. Khuain tlai lam a pan zel a, a hnim deuh ruai a. Unau hmel hai a nih meuh chuan rual mal a tla ta phauh phauh mai a.

Hun ka han en a, darker thum rik nan minute sawm panga chauh a awm tawh avangin front office ah trunk call ka zuk dil ta a.

A tlang lawk thei lo a, ka lungphu chu a rang tual tual mai a. A tawpah chuan a tlang ve ta hram a. “…aw.. minute sawm velah… ka huphurh e!”

Keipawhin ka huphurh ngei mai. Darthlalang hmaah ka han in en leh te te a, lobby panin ka chhuak ta a. A vawt ka tih vang pawh ni lemlo chuan ka chhungrilah ka khur ru der der a.

Hotel kawtah chuan rei vaklo ka ding tihah chuan sumo hi a rawn ding a. An han chhuk sap sap. Thinphu dep depin ka lo thlir reng a. Ka dinna lam kawngkharah chuan vainu pawr ve tak hi a rawn chhuk a. A ni kha chu ni theiin ka hre bawk si lo.

A hnunga bungraw hlangthlak lo dawng tur ka va hmu a. A ni… hnung lam atang pawhin hai rual a ni lo. Tichuan….
…………………………….to be continued

Jul 22, 2011

Sipaiah ka intlar ve a...

Naupan lai (ti ve khanglang i la!) chuan silai hi mipa naupang kha chuan kan han lawm thei khawp mai a. Sikul banah kan 'in theng kah' thin a. Bihrukna atangin chal akn ti lawr dek dek a, "I thi" an rawn ti lauh mai a. Pil zak pahin "ka pil hman!" kan han ti hram thin kha tunhnu hian a lo ngaihawm ta ngawt mai.

Silai sawi takah chuan mi dilah kan cheng ru a, air gun (.22) hian a neitupa hian min tin a. Kan han hlau mai mai khawp a. Kan thianpa pakhat tuichen thiam vak lo hi a thuk lam panin a lut phei ta mai. "Ka thaw thei .. ip..." a tih dawn meuh chuan dil neitupa tuiah a zuang thla vat a, a va chhar ta a. Keini erawh remchanna leiin hlau bak lengin kan tlan chhia a. Tlai lamah inlamah kan inhmu ta tham tham a.

Tuichen sawi takah chuan Champhai Holy Cross sikul ho hian hostel a awm te tan dil thianghlim tak an nei a. Chawlhni hian kan cheng ru thin a. Kan zinga rual u ve tawh tak hian hostel tleirawl ho hma ah chuan kekawrte phelhin a 'mihur' tui hleuh zak zak mai a. Chutih lai tak mai chuan an Brother a rawn tlan thla ta mai. Midang zawng kan tlan chhe hman a. Tui a cheng ber erawh tlan chhuah chuan a ruak ve laklawh tawh bawk si. An in man chiang teh a sin.

A thupuiah lut dawn tawh i la. Heti hi a ni a, pawl sawm kan han zo ve a, kan zirlai pui pakhat chu sipaiah hian a tui em em mai a. A intlar deuh reng mai a.

A thlawn a intlar theih na na na chu tiin tum khat chu lawng sipaiah ka va intlar ve ta a.

Written chu kan zo mai a, result pawh objective a ni bawk a a chhuak nghal mai a. Chawhnu lamah chuan medical kan nei dawn ta a. Mizo keimah chauh ka tling a. Tichuan, kekawrte nen kan ding ta thau mai a.

Lawng sipai dawktawr pa chuan a mal te te in a rawn en fel a. Ka zawn a rawn thlen chuan a kut zungtang chu hnuai lamah a ti bu nghauh a, "Phelh rawh" a tihna ni ah ka ngai ve mai a. A kutkawr bun chu an siam tha te te a, "Pull back" a ti leh a. Ka ti ve leh mai a.

"Khuh raw" a ti leh a. Ka khuh kharh kharh a. Ka nuih a za ta tlat mai a. Daktawr pa chu a thin rim ta a. Min hau ta hrep mai a. Ka chip ve tak reng a vang chuan min kal pel ve ta a. Ka piah chiah a ding Naga pa chu a han ti ve leh a. Ka va melh ru a. Ka insum zo ta ngang lo a, ka nui ta vak mai a. Rum tawkin min rawn melh a "Nang aiin a*** lian!" a rawn ti kha ka nuih a za tawlh tawlh ta mai a. Min hnawt chhuak ta a.

Physical exam an ti ve a. Panga la tling zingah khan hun tiam chu sawi loh tlan thleng hlei thei kan awm lo a. Mahse midang an awm miau si lo va. Ka tling ve leh ta a. Hemi tum hian keimah chauh Mizotling ka awm a, ka zawm ta lem lo.

Tum hnihna....
Tin heti hi a ni a. Tlai khat kan sikul bang haw lam hi AR lammual ah khian sipai an lo la leh mup mup mai a. Hei ve thung erawh khawmual sipai tur a ni an lak ni. Thianpa sipai ngaisang deuh pa chuan "Hawh u i zuk in tlar ve ang u" a ti ngawt mai a. Pali kan ni a. Kan zuk thlir a, clerk tur khan kan zuk intlar ve leh ringawt mai a sikul uniform nen.

Khawmual sipai chu an dan a lo dang a. Intlansiak a beih hmasak tur hi a lo ni a. Uniform nen chuan kan in tlar ve a. Lammual bial hian hrui an hling a. Mihring pawh an tam khawp mai a. Vawi li tlan hel tur ni ta in ka hria. Vawi khat kan tlan chhuah chuan sipai tan chak ber chu a thal ta tawp mai a. Ka la tlan ve zel a, vawi 3 na ah chuan thian dang 2 te pawh chuan min peih loh san ta a.

A tawpna tur chu ka tlan mek a, ka lu hi a hai nasa tawh khawp mai a. Chhim lam goal ban ka tlan pel ta, ka leh pel ve teuh mai . Ka tlan thleng ve dawn chiah tih ah chuan sipai lo ding chuan an hrui zen ken chu an lo pawt chho thut mai a. Ka tling lo chiah chiah hi a lo ni a. Ka tlin teuh em avang chuan nge ka chauh em vang pawh ka hre tawh lo, ka mu lui ta tlat mai a. Sipai 2 in min zawn chhuah lai erawh ka la hre vuai vuai a. Hei erawh ka tla hma ngei mai.

Tum thumna....
Pawl sawmpahnih ka zirlai hian hna hi ka zawng ve nasa hle mai a. Future Vision an tih ah te khan kan thawk ve zak zak a. Exam leh interview theih kha chu thelh kha ka tum lo hrim hrim a. Bula mi ten an zir a niang Airmen exam tur chuan form ka thehlut ve leh ta a (zawm ka tum pawh a ni hran law!)

A hun a lo thleng a. Written kan exam lai chuan ka bula thu pa hian a rawn entawn a, ka zo tawh na a ka la thu reng a. Vanduaithlak takin min man ta hlauh mai a. An squadron leader pa chuan paper pawhthlak leh min ben an rual thuai mai a. Thlawkna sipai ho chu an va sual mai mai ka ti rilru ngam tawk a.

Ka paper a pawtthler a, a thar min pe a. Mahse, hun kha darkar chanve pawh ka nei tawh lo va. Ramhuai speed chuan kan ziak zo ve leh hman hram a. Result an rawn puang a, ka tling ve leh ta hlauh mai a. Medical neih a lo hun leh ta a.

Airforce ho tih dan chu a dang khawp mai a. Room khatah hian bang hawi zawng hian kekawrte nen kan ding thap mai a. Mawng hlui deuh deuh leh thing ve tak tak hmuh erawh chuan ka zam ta bik em lo va. Khatiang a in check up kha tun thleng hian ka nuih a la za nia maw le.... :D

Kha mi tum khan intlansiak lam reng reng a awm ka hre ta lo. Boruakah chuan tlan a har deuh a niang. Tin, khami tum khan Mizo paruk kan tling a. Pakhat chauh khan a zawm ta in ka hria. Tun hnuah Port Blair lamah a awm thu ka dawng.

Intlar vawi li-na....
Hemi tum zet hi chu tum vang pawh ni tawh lo in NDA exam tura ka inpuahchah lai a ni a. Thiante lawng sipai exam tur ka kalpui a, application pawh ka submit ve lo va. Mahse thiante exam lai chuan a rawn la tupa chuan min fuihpawrh ta a. Hun tawp dawnah chuan ka va thu ve leh ngawt a, ka tling ve leh ta mai a. A tukah document te ka keng chawp ta ruai a.

Medical exam pawh ka hnehsawh tawh khawp mai a. An sawi hma hma khan ka lo Adama suit hman vel a, a in dawt dan pawh ka lo sawi lawk zung zung thei tawh a :P

Hemi tum hian Mizo pali kan tling a. Kan zavaiin kan zawm ta dial a. Tum loh deuh mai sipai lubawk ah kan tang ta reng chu a nih hi :P

A tlang kawmna...

Eng vanga he thu hi ziak vak nge ka nih pawh ka hre lem lo. Ka pa hian sipaiah i tling thei lo hrim hrim min ti tawh a. Mahse, thlawhna leh lawng sipai ah chuan ka tling ve chiang kawp mai (lawng sipai phei chu vawi hnih :P) Khawmual sipai erawh thiam lam en hmain tlanchhiat chak leh chak loh min tih tir avangin ka tling zo ta lo va ... ha ha ha..

Ka thiante ho hian ka tlin hlim hian kan thenawm pitar hnenah " A ni chu lawng sipai te chi ah a tling a, zu te chi a dawng ang a, hlawh pawh a te chi..." an lo ti a ni awm a. Zawhna ka dawng nghe nghe! :D

Tin, heti hi a ni a, hun leh kumte an liam zel a; tun atang a kum li hnuah chuan pension hlawh ka lo la ve thei dawn tawh reng hi a lo ni a...

.....auh ruai ka nuam thin e nunhlui zamual liam hnu...

(Note: Sipai tan chak ka tih pa khian a chhiar ngei ka beisei a, a comment ka lo nghak nghe nghe. Tunah Army ah tangin Haiti lamah UN Peacekeeping Force lamah a awm ni awm tak a ni. Ka sipai hnu ah a rawn training zo hi Aizawl a ka u te inah a rawn leng a, ti ti a thiam bawk a a haw meuh chuan ka u chuan "I thianpa chu sipai tak tak a nih kha. Silai te hi in kap ve ngai lo vem ni?" min ti hlawl mai! :D)

Jun 19, 2011

Hmangaihna leh zu

Hmangaihna history leh zu history hi sawi kawp loh theih a ni lo va. Khawi zawk nge chhuak hmasa tih pawh hi ‘artui nge ar note’ tih thawnthu ang vel a ni awm e. Mizote hi hmangaihna ngah tak kan ni kan tih chuan ‘zu duh tak’ hnam kan lo ni tih pawh hi thudik awmsa ni awm a ngaih theih tur a ni ti kan awm a nih pawhin a diklo bik chuang lo thei awm e!


A tirin thu a awm a, thu chu tisa ah lo changin , tisa chu zu hmangaihna ah a tlu lut ta nge chu ka hre zui ta lo. ‘A nawmna leh hrehawmna hre turin’ ti a sawi te pawh an awm awm e. (A bul erawh nawmsakna leh hrehawmna puipa tura siam ti te pawh an awm!)


Amaherawhchu, eng ram leh hnam thawnthu ah hian nge zu tello a hmangaihna a lo pian chhuah a, hmangaihna tello a zu chauh a lo mal tlat tak? tih hi ka ngaihtuah ta mai mai a .


Kan Zo thawnthu ah pawh hmangaihna a lo lan a piangin zu hi a serh zinga a mei ang maiin a lo in rawlh ve sek a. Shakespeare atanga M&B thleng hian zu hi hmangaihna nen an lo chawhpawlh tawh” an ti, chhiar mi ten.


Mizote leh khawthlang mite kan danglamna chu, ‘anni thawnthuah chuan zu a lang phawt a, hmangaihna a lo piang thin a’. Keini ve thungah erawh chuan ‘hmangaihna a rawn lang hmasa phawt a, zu in a rawn zui ta thin a ni’ pawh ka ti chuang lo a.


Hmangaihna nen a zu thlit karh karh kha chu ruih sual pawh a lo har deuh bik a. Tunlaia a ruk a ral a hmanhmawh pheleng a ‘hmangaihna tello a zu in’ thin nen chuan a danglam deuh a ni awm e ti a sawi an awm pawh ka ti bawk hek lo.


Engpawhnise, mi huatthu ka sawi em lo ang chu maw? Ka hum lo ka lo dai palh a nih pawhin min lo ngaidam ang a, min ngaihdam loh pawhin pawi ka ti chuang lo a. :D Hmangaihna leh zu inlaichin dan ka han thai lang mai mai teh ang….


1. 1. Hmangaihna hi ruihsual theih a ni, zu ang bawkin :P


2. 2. La tem lo ten zuin hi a thalo an ti thin ang bawkin hmangaihna la tem lo ten hmangaihna tak tak a awm lo an ti chawk!


3. 3. Zu tem tawh chu an zawng chhang tlangpui a. Hmangaihna tem tawh lak lawh chuan hmangaih tur hi an hmu zung zung mai an ti :D


4. 4 Hmangaihna hi khap chi a ni lo va, chhungkua leh khawtlangin duh lo viau mah se an thih pui thak thak mai. Chutiang bawkin zu pawh hi khap eng ang mahse an thihpui thak thak mai :D


5. 5. Sawi duah tawh lo mai ang. Hmangaihna leh zu hi mimal duhthlanna liau liau a ni a. Inhnawn luih chi a ni lo. Hrui a hlin beh chi pawh a ni hek lo.


A duh duh lo in hmangaih se la, a duh lo lo Pu Pawla’n a lo sai ang a. Zu pawh a duh in in lo se, a in duh duh kha chu kohhranin sai ve mai rawh se…….. tih hi mumanga ka hmuh pawh a ni chuang lo :P