Jun 28, 2010

Ka pianna Zoram nuam

Mizoram, ka pianna hi ka hmangaih ka ti teh fo va. Hmangaihna awmzia ka hriat loh vang zawk em ni? Kolkata Airport-ah Zoram haw turin thlawhna ka nghak mek a. Ka han tei kual vel a, Arunachal Tourism/ Tripura Tourism ho dawrte ka hmu a. Mizoram Tourism dawrte ka hmuh ve tak mai loh ah chuan ti hian ngaihtuahna a rawn lut a.

"Mizoramah enge thil lar/ bik product emaw min lo hawn teh a?" ti hian ka haw dawn hian vai thiante ho hian min zawt teh fo va. Han chhan mai ngaihna hi ka van thin khawp mai. Eng hi nge maw kan thar ve a eng hi nge maw kan siam chhuah ve le?

Mizoram chu a buai em? Nun a harsa viau em? Militant an tam awm? tih zawhna te hi ka dawng fo va. Ka hmangaih em em ka tih ka ram riangte hi a tha lam sawi tur hi ka van teh thin a sin. Hnam dang bulah chuan sel duh mah suh i la, thinlai a na vawng vawng tih ang deuh hian rilru ah te hian a that lohna lai zawng te hi a rawn in tlar keuh keuh thin a.

Kan hmangaih te chu an chhiatna lai kan hmu tha a, an famkim lohna lai kan hmu mam thin an ti si a. Kei ve thung chuan ka pianna ram ka ngaihtuah a piang hian eirukna, a te ber atanga a lian ber thlengin, hlem hletna, nun khaw lohna leh engkim mai hi a ni tur ang ni lo vek hian ka thlir fo thin.

Tun atanga rei lo te ah kan ram thlawhna tum hmunah damte a ka awm chuan ka tum ang a. Lengpui Airfield, thlawhna atang in kan han chhuk anga, kawtkai han han chhuak anga, fur tuiin a chawmno lai hnim hnah hring leh ralkhata thing hring ding thap mai ka han thlir ang a.

Mahse, ka han hawi zau deuh anga, chung thing hring te chu thing tuai, NLUP sum an sem hun huna kih darh leh mai tur, a thar erawh hmuh tur awm leh chuang hauh si lo a ni ang a.

Dawrte tlem a zawng kha din pawh ding zo lo in a lo tlu awn bem ang a. Ban hmuh theih ang ang ah chuan kuhva hring eina chinai bangnawi tahna in a lo in tial biai ang a.

Aizawl panna i han ngaihtuah ang a (mite angin motor-in min hruaitu ka nei ve dawn si lo!) Taxi chuan man kha 500 a lo ni leh dawrh ang a. Kolkata atang a Lengpui cheng 2000 leh tlem, darkar khat chhunga thlen theih kha Lengpui atanga Aizawl chu cheng 500 lawih chawiin darkar khat dawn vel tho hun i han hmang ang a. Public transport system hi PPP em ni kan neih dawn kha? kan ti rilru leh neuh neuh ang a.

PTC ka han tlan pel chho ang a, RV a lang thei maw tih velah khan failed governance tiih rilru ah a lo lut leh ang a. Khaw chhung kan han thleng ang a........ ngaihtuah chhunzawm tawh rih lo teh ang!

Ka ram riangte hi ka hmangaih ka tih chuan mifa ten hmangaihna mawi taka an lo hrilhfiah sa chu ka dah nil dawn tihna a ni si. Eng ka ti ta nge ni le???

Lentupui kai vel leh romei chhumin,
A bawm kan Zoram nuam leh duhawm........................................................





17 comments:

  1. Hman atanga ka ngaituah fo thin i rawn thaichhuak nalh mai le. Thil tha hi a awm thlawt lo nge, ka thlir thim lutuk thin tih hi ka hre tawh bik lo...

    ReplyDelete
  2. NE a awm si in, Mizoram chiah hi ka la tlawh lova, kan chhungin tlawh kan tum a, tourist attractions eng eng nge awm? khawnge kan kal ang? tia zawhna ka dawn hi chhan a har ka ti thin.

    Kan tlang lah chutia hmuhnawm thama sang leh mawi (Tawang Arunachal tlawh tawh tan) a ni si lo. "Mizoramah chutiang han hmuhnawm tur engmah a awm hran lo, mahse kan Society khi a danglam em avangin in tan chuan thil thar a nih ka ring" tiin ka chhang thin.

    ReplyDelete
  3. Thil sawi thiam har tak ani.Mahse,kan ti teh ang, Kan sel avang hian kan hmangaih lo tih na ani chuang lo.Mizo ram leh hnam zia tha lo then khat sawi sel te hi in tih Mizo lohna ah kan in puh khawlo va,kan nihna dik tak pawm ngam/ duh lo vin ostrich ang maiin kan lu kan phum bo thin a,kan tha awm mai mai thin ni te pawn a lang. Thalai internet hmang tam tak dan atang hian Rilru Revolution siam na hmanrua tha tak anih ka bei sei. Rawn ziak zel rawh. Tih dan tha i hriat chu insum lovin ziak zel bawk rawh. Zoram in a mamawh che.

    ReplyDelete
  4. helam hi i vei ve ngawtin ka hria, i sawi dik khawp mai. Mite chuan Traditional Food te an nei a, keini hi kan neih awm pawh ka hre lo ka ti.. i hriat chuan min lo hrilh teh.

    ReplyDelete
  5. I va sawi dik em! Hmangaih avangin rilru a na a ni zawk e...insum reng reng suh!

    ReplyDelete
  6. A nia sin..kan ram hian hma bak kan la ngah khawp mai, mi rual a hma sawnna rah bi kan pen mek na ah hian.

    ReplyDelete
  7. Ngaihtuahna i ti kal thui hle mai. Pawn lam atanga thlirna hi ka lo nei khat hle tih ka inhre chhuak. A chhunga cheng mi nawlpui hi chuan pawnlam boruak ngaihtuah tel lem lovin nuam ti ve tak hian kan thaw ve ham ham ringawt hlawm a nih ber hi.

    Vaiva meuh pawhin Zoram i hmangaih em em si chuan, kei Zova ho hi ingaihtuah harh kan va hun ta em!

    ReplyDelete
  8. "Kan hmangaih te chu an chhiatna lai kan hmu tha a.... Kei ve thung chuan ka pianna ram ka ngaihtuah a piang hian eirukna,....

    "Ka ram riangte hi ka hmangaih ka tih chuan mifa ten hmangaihna mawi taka an lo hrilhfiah sa chu ka dah nil dawn tihna a ni si. Eng ka ti ta nge ni le??? "

    He lai thuah hian Chawlhna Lui a luang a niang, a mawidanglam in ngaihtuah a ti thui hle mai..

    ReplyDelete
  9. Ram hmangaih tu rilru ah chuan ram hi a tha ngailo! siam that ngai a awm reng. I sawi dik khawp mai. Tuna kan kalphungah hi chuan, "Ram hmangaih tur kan neilo vat ang tih a hlauhawm ber e"

    ReplyDelete
  10. This comment has been removed by the author.

    ReplyDelete
  11. Kolkata hi a ni kei pawh ka thin khei zak toh tu chu.
    2001 kuma ka zin tumin "The ninth oldest regular museum of the world" ni pha ,INDIAN MUSEUM, Kolkata ah khian ka leng lut ve a. 'CULTURE & TRADITION' section (ni ta in ka hria) ah India state hrang hrang tradition tarlangin, state hrang hrang hnam puan te , an lamdan te ..mihring lem mipa leh hmeichhia leh naupang te ah dah teuh a.

    Kan unau state Manipur, Nagaland, Assam te chuan an lo dah thup mai a.Ka state ka chhuan ve em em leh ka hmangaih em em MIZORAM chu ka hmu zo ve miah lo (Tunah khian a awm tawh nge la awm lo chu ka hre lo).

    Heng te te vang te hian niang chu Zoram pawnah Assam te an hriat em em a , Mizoram kan tih apiangin China ah ami a awm min tih ziah ni ... I rawn let pahin han lenglut ve chhin teh

    ReplyDelete
  12. @luliana: "Every cloud has a silver lining" :P

    @David Ralte: I chhang thiam thlawt a lawm chu! Kan society hi mak danglam ve deuh chu a lo ni :D

    @Dr_feelgood: I am flattered :P Ziah zel ka lo tum ang e

    @Varte: Hotunu, kan vei bawk a niang e ti rawh! Kan traditional food chu SA UM :D

    ReplyDelete
  13. Ngaihtuah a tithui khawp mai. Mizoram ka veina hi nalh takin, dik tak siin, mite rilrem zawng takin han ziak chhuak thiam ve ila chuan, khawii maw kil khatah chuan, tu emaw tan chuan far khat tal a tling thei mahna.

    ReplyDelete
  14. Thank you all! Kumin chu keimah rau rau ah thuziah lam a lang lutuk lo a. In hun hlu tak in rawn sen avangin lawmthu kan sawi a ni e. Kan ziak ve leh tan thei tawh ang chu maw!

    ReplyDelete
  15. Ram enkawl tu te hian kan ram hi an hmangaih hlawl lova, mipui te pawh hian kan dim lo thuai thuai khawp mai. Mizoram mipui tam zawk hian kan ram kan hmangaih lova, thahnem pawh kan ngai heklo, a sawi kan peih a, a tih erawh sawrkar mawh emaw kan ti. A pawi thui lutuk tawh!

    ReplyDelete
  16. Vaiva, i ziak tha hle mai! Zoram kan vei loh chuan eng ram nge maw kan vei tehlul ang tiro?

    ReplyDelete
  17. tlai khaw hnuah kan han chhiar ve leh a, beng a verh hle mai....an lal loh lai chiah hian ram hi an hmangaih emawni ka ti ve thrin.....

    ReplyDelete