Jan 11, 2010

An va hlu em!

Kumthar kan lo chuang kai leh ta reng mai. Hrisel tak mai leh dam veh vawh a kumhlui mahni te chauh mai a han thlah chuan an lo va hlu em .....! Hriselna tha min pe tu chungah lawmthu kan sawi hmasa ber teh ang.

Kei, thlarau mi em em lem lo leh tawngtai na lamah phei chuan chhungte leh thenrual thate tawngtaipuina rinchhan ti tih pawh hian mi fate leh nu leh paten harsatna an tawh zinga hrehawm an tih ber mai natna leh hrithalo laka him dam tak mai a kumthar ka chuang kai leh thei hi lawm lo thei ka ni lo. A va hlu em!

A pahnihna ah chuan kum hei leh chen mahni in lo tei rawlai ve tawh thin mah i la, masi boruak leh kumthar vuak vetah hi chuan mahni IN lum ngeiah ka hmang ve hram thin. Tlangval a pumpa han in ti ve thin teh mah i la, mahni te chauh mai a urlawk zan leh kumhlui thlah zana vai thiante zawng mai biak tur an han awm chuan an lo va hlu em.....!!!! Chhungte leh thenrual tha te..... an lo va hlu em!!!!

Inah haw mah i la, he zan hnih kherah hi chuan ka leng chhuak ngai lo. Chhungte be lem lo mah i la, an kianga awm lo nawm zia kha vai bula han men kar mai chuan a lo chiang duh khawp mai. Mahni tein Bethlehem han thlir dawn i la, "A lannna mual dang a awm si lo" tih ang deuh khan, a awm lo nge hawina lam tur ka hre der si lova. Tukverh hmalamah dak chhuak i la, lawng chawlhhmuna dinna chang lo lawng thir chakai thlaka ding eng chuah chuah bak hmuh tur a awm si lo. Hnung lam balcony ah dak chhuak i la, khawpui in sang tak tak karah zan dang ang bawkin a eng dul ruih mai si a.

Ka khua te hi a rukin a har veng veng reng a. Phone han hmet dawn i la, zan tantirah chhungte chu ka be zo fel diam tawh si a. Tawng duh ve tak mah ni i la, chhungte bulah hi chuan pa tawng tlem tak ka ni ve tlat a. Sawi tur ka nei tawh mang si lo va. Tih tur kha a va han awm lo lulai leng teh reng em! Mahni te chauh mai a han CRP mut ngawt kha chu ka tlawm la ve deuh si a. Sandman a ten an lo hria ang tih kha ka hlau ve deuh bawk si. Dar 12 chu ka meng thleng ve ta hram a.

Amaherawhchu thil hlu pahnih ka chhar chhuak ve thung a. "Chatuan rohlu" ka chhar ta em tih erawh ka chiang chiah lo na a, hriselna tha leh chhungte, nu leh pa unau duhawm tak tak min pe tu Pathian chunga lawmthu sawi lo thei ka ni ta lo a. A theih anga tawi chuan kan tawngtai hram a. Ka mu ve ta a.

15 comments:

  1. Vaiva i va han ropui em! chhungte hlutna hre lo hi an tam teh reng nen...chhungte ai a midang thlang zawk thin hi chuan khuareiah an in chhir reng thin asin. CRP mut tih lai khi ka khi vun. Chung lam rem ruat a thlen hunah chuan CRP mut toh bik lo ang ha...ha...

    Pathianin malsawnna tam tak nen i hma hun a hruai zel ka duhsak a che.

    ReplyDelete
  2. I thlalak ka hmu, i thuziak nen a inrem lo .. haha!!

    I ziak tha hle mai. Tunlai chu ka fit lo riau a, ka internet tam hleithei lova, i post pawh ka lo chhiar har hret. Happy new year le.

    ReplyDelete
  3. Biateho pawh khawiah nge krismas i hman dawn tia an zawh chuan, 'e, a hmunah ngat le' tiin an chhang thin an ti a. Biate khaw baka krismas hmanna hmun nuam awmin an hre lo a ni.

    Heng hunlaia i khua a hara i lung a leng hi i thiamawm khawp mai. I thil chhar chhuah pawh hi ava hlu em!

    ReplyDelete
  4. Ni e.. chhungte leh thenrual te hi an lo hlu a ni... :-)

    ReplyDelete
  5. @Irene: Ka va han lawm e... Ni e, ka CRP mut rei tawh bik lo ang :P

    @Zaia: Enge ka thuziak leh ka thlalak a in rem loh na.. ? :P Khawi atangin nge ka thlalak te i lo hmuh bik a aw... Happy New Year le

    @fela: He he, Biate daih daih ! Iu R Uelkham in my blog... lo leng lut fo dawn nia

    @alejendro: 26 ah picnic tur anih kha auh! Nang huau huau lawmah :D

    ReplyDelete
  6. Mal-tlat vang vang ngam leh peih hi a ropui! I fakawm e, tawng tlem hian thu an ziak hnem duh phian! A bengvarthlak hle mai!

    ReplyDelete
  7. Krismas hi chhung kim in kan hmang lo zeuh zeuh va, tun kum chu kan kim dawn emaw tih laiin kan fanu a lo haw thei lova, rin ai takin ka dissapoint a. Mahse thil min ngaihtuah tir a. Chhungte lo boral ten Mas hman an han huphurh ta viau mai, chhungkua an han kim tawh lo tur te ka ngaihtuah a. Chutiang em nilo mah ila, tum hun a han kim loh chuan, mi te din hmun min hriat thiam tir leh zual. Engkim mai hian zirtir a nei alo nih hi.

    ReplyDelete
  8. Chuvang alawm "Kar hla-a leng, rual duh zawngte, in dam lai em ni le..?" ti tala an auhzui lawm lawm thin le.... kei pawh mahni-a hman chu ka la ti thang miah lo.

    Unaute nen, an fa-te nen, bawngbawr takin Aizawl ah kha chuan kawtthler an chei te en pahin kan kual dem dem thin a, a lo nuam ngawt mai. Kumtharah chuan mahni chauh lo nen i hmang ve tawh ang chu.. :)

    ReplyDelete
  9. @chawnghilh: Tawng tlem tih kha chu hchungte bulah chauh a nia. Sandman a dawtah chuan ka tawngthei ber ang Lolzzz

    @dr_feelgood: A dik khawp mai. Chhung kim lo a krismas chauh ni loin hunpui enge maw han hman chu a huphurh awm khawp ang le. In fanu pawh a khua a har ve duh khawp dawn chu! :-(

    @Varte: Hotunu nge nge, kan hriat ve reng kan sawi chhuah thiam si loh hi a rawn phawrh thiam thin e. Ka lawm em em e. Ka u fate ho hi halpuah ka halpui chiam thin ka haw chuan, kumin chu haw mah ila kha a hal theih chuang loh a nih kha he he

    ReplyDelete
  10. E, lunglen hnemah Vaiva khawi mai rawh....Lolzzzz....

    ReplyDelete
  11. Keipawh Krismas leh kumthar mahni in lum ngei a,chhungte kiang a hman loh hi chu harsa ka ti..phairam a lehkha ka zirlai hian vawikhat chu ka haw lo a,mittui a hnai duh teh e..

    ReplyDelete
  12. @chhangte_ll: Khawi mai dawn em ni ? Lol

    @Anonymous: Chhung leh khat thenrual te hi hlu deuh asin an nih! He he...

    ReplyDelete
  13. This comment has been removed by a blog administrator.

    ReplyDelete
  14. Nang nge2 hi chu, thu leh hla lamah na2 hi chuan duai lo teh e, tha khawp mai

    ReplyDelete
  15. ziak tha khop mai ... Mahse Ziakmi-te suangtuahna khovel hi ka hre hrang thiam lo thin a..In hmu chhuak tak tak anih chuan tha leh zual ..

    ReplyDelete