Oct 21, 2010

Bike thar ka nei ve ta!

Hun rei tak a ni ta. Ka lo vak bo rei thui deuh a ni ang e. A bul tan nan ka thil thar neih ve hi kan sawi ve teh ang.

Archives in en chuan ka post hi kum telin a tlem tial tial mai a. Kumin phei chu 3 chauh a la ni! Hnar hnuaiah phatna a awmlo an ti a ni lawm ni kha! A chhan pakhatna ah chuan ka thatchhia a, pahnihna ah chuan duhthal a duh hawi zawng zawng sawi hi India Constitution hian min phalsak ve hauh lo mai a. Rei fe ka buai hnu ah Unofficial-in phalna ka hmu ta chauh a. Ka e-mail thlengin min check sak vek hnuah ziak leh thei tawh turah in ngai i la. SNS tak ngial ah pawh thlalak chu sawi loh hming lem/ pen name kan hmang reng rih zel phawt ang.

A thupui lamah aw.....

Tin, heti hi a ni a, tuifinriat lama kum tel ka cham hnuin nikum June thla khan khawmual lamah min dah ve hlauh mai a. Kum hnih/thum tal awm ve beisei lai tak mai in kumin february thla tirah khan FAX ngatin ka transfer order a rawn thleng leh ta a. Ni thum chiah hun min pe a (Bungrua ka la nei tlem tih an hria a :D). Angai te bawkin February ni 10 khan lawngah ka in pu lut leh ta a.

Mumbai ah ka lawng a la cham bang a, May thla tawp lamah chuan ka awmna thar tur lamah kan hawng ta a. Ngaiteh, lawng chawlhna atang chuan khaw hnai ber pawh kha chil chhak phak a ni ta hauh lo mai a. Thingtlang a la ni zui a. "Zanin chu pawnah kan ei chhuak teh ang" tih pawh kha ke chuan restaurant hnai ber (awm chhun :P) pawh kha minute 40 dawn kal a lo ni ta a.

Bike ka lei ve teh ang ka ti a. Ka neih sum te ka han dap khawm a. A hlui ka duh ang ka hmuh mai loh avangin Pulsar 135 LS te kha ka lo melh hman tawh a. Mumbai lama ka thawhpui hlui ta RX G 135 cc ve ngat kha "I duh chuan i nei dawn nia" a rawn ti ta hlauh mai a. A that leh that loh lam chu dahtha ta i la, ka inhmeh tawk dawn viau in ka hre ta a.

Khuangchawi thla a lo de a, Mumbai lamah kan zin leh ta hlauh mai a. Sangnga lai te chu chhiar ve mah se la, Sanghnih pein 'a siam man a zirin' tiin ka hneh chhuh ta a.

Zan khatna ah chuan thianpa Benjamin a a rawn leng a. In ti polite fahranin "Ka va thlah ang che" tiin ka hawl chhuak ve a. A vawikhatna atan! A light chu High Beam ah chuan a eng ve thei a, amaherawhchu a chhun hniam cher cher khawp a, a ke hma kan hmu chiang tawk vel chauh mai si a. Tlan chak pawh tum i la, a ngaihna a awm rih lo a ni e.

A awmna leh ka awmna lai hawl vel tak maiah khan a petrol a zo ta tlat mai a. Tlem te chu kan nawr hram a, a thar lawm nan!

A tukah workshop-ah ka tlan luhpui nghal a. A nun laklawh chuan a nung tha khawp mai a. "A chhe lai lai kha han siam phawt teh", kan tih ngawt mai a. Ka chuan laia dinglam nger tlata ka inhria kha a chassis a lo kawi hi a lo ni a. Thlak tur zawng zawng a han sawi chuan a man let dawn sen a ngai ta mai a. Servicing phawt teh ka ti ta a. Ka tlan chhuak tur kha a clutch handle hi a tla ta daih mai a. Ka zuang thui khawp mai :D ( Ka tlan haw lam, Colaba, Mercedes leh Ford car man to ber ber zinga an rum ve hlat hlat mai chu a chhunga chengte pawhin awt ve tih hriat tak hian min thlir dauh dauh mai a ni)

A la tlan theih tho hi tiin ka awmna lamah ka phur liam ta a. Sunday zan khan a thar kan lawm tha leh a. Kawng khuar lai ka dai palh hlauh mai a. A head light chu a thim ta daih mai a. Kan sawi vel a, a eng thei tawh si lo. Tichuan, kawng khuar lai ka dai leh hlauh mai a. A rawn eng leh ta a. Kha ta tang kha chuan a thim palh chuan kawng khuar deuh lai zawngin ka mobile a torch light ka seh kawh a muang fahranin ka tlan de de tawh mai a ni.

In ngaih ang em em chuan a chhe bik lo a. A chahbi vuahna hi herh uluk deuh a ngai a. A tanky hi ben hawn theih a ni bawk a. A hnung lam light pawh a la invuah ve a, wire a inzawm lo mai tih loh chu! A hmel en pawhin a la thar tha khawp mai a.

A nun theih loh chang erawh pawhin han namthlu tawp i la, han kai tho leh i la, a nung ve leh mai a. A engine pawh a ring vet vet khawp mai a. A taksa pawh thirzai a la tawnkhawm that tlat a ni a. Mipawh a la phurh theih a. Weekend a Goa han fawr lawk nan erawh midang bike hawh thleng tur a awm reng tho a.

"Ka hang na a ka nalh a nia" tih ang deuh khan "Ka hlui tawhna a, ka la tlangval a nia" tih en hian min en ha reng mai a. Nula phurh tur melh pawh kei ai chuan a la peih hmel zawkin ka hria. Parking space a duh zau deuh a. Maruti 800 lenna ah chuan a la park theih ve tho va. Ka awmna ah motor a la tawt lem lo bawk a harsatna a thlen hran lo.

Hna lama ka buai em avangin a thla pawh ka la la hman lo a, thlalakna dawr ka tlan pelh ve leh ka rawn update ang che u. Kei chu bike thar ka nei bikkk :D


Jun 28, 2010

Ka pianna Zoram nuam

Mizoram, ka pianna hi ka hmangaih ka ti teh fo va. Hmangaihna awmzia ka hriat loh vang zawk em ni? Kolkata Airport-ah Zoram haw turin thlawhna ka nghak mek a. Ka han tei kual vel a, Arunachal Tourism/ Tripura Tourism ho dawrte ka hmu a. Mizoram Tourism dawrte ka hmuh ve tak mai loh ah chuan ti hian ngaihtuahna a rawn lut a.

"Mizoramah enge thil lar/ bik product emaw min lo hawn teh a?" ti hian ka haw dawn hian vai thiante ho hian min zawt teh fo va. Han chhan mai ngaihna hi ka van thin khawp mai. Eng hi nge maw kan thar ve a eng hi nge maw kan siam chhuah ve le?

Mizoram chu a buai em? Nun a harsa viau em? Militant an tam awm? tih zawhna te hi ka dawng fo va. Ka hmangaih em em ka tih ka ram riangte hi a tha lam sawi tur hi ka van teh thin a sin. Hnam dang bulah chuan sel duh mah suh i la, thinlai a na vawng vawng tih ang deuh hian rilru ah te hian a that lohna lai zawng te hi a rawn in tlar keuh keuh thin a.

Kan hmangaih te chu an chhiatna lai kan hmu tha a, an famkim lohna lai kan hmu mam thin an ti si a. Kei ve thung chuan ka pianna ram ka ngaihtuah a piang hian eirukna, a te ber atanga a lian ber thlengin, hlem hletna, nun khaw lohna leh engkim mai hi a ni tur ang ni lo vek hian ka thlir fo thin.

Tun atanga rei lo te ah kan ram thlawhna tum hmunah damte a ka awm chuan ka tum ang a. Lengpui Airfield, thlawhna atang in kan han chhuk anga, kawtkai han han chhuak anga, fur tuiin a chawmno lai hnim hnah hring leh ralkhata thing hring ding thap mai ka han thlir ang a.

Mahse, ka han hawi zau deuh anga, chung thing hring te chu thing tuai, NLUP sum an sem hun huna kih darh leh mai tur, a thar erawh hmuh tur awm leh chuang hauh si lo a ni ang a.

Dawrte tlem a zawng kha din pawh ding zo lo in a lo tlu awn bem ang a. Ban hmuh theih ang ang ah chuan kuhva hring eina chinai bangnawi tahna in a lo in tial biai ang a.

Aizawl panna i han ngaihtuah ang a (mite angin motor-in min hruaitu ka nei ve dawn si lo!) Taxi chuan man kha 500 a lo ni leh dawrh ang a. Kolkata atang a Lengpui cheng 2000 leh tlem, darkar khat chhunga thlen theih kha Lengpui atanga Aizawl chu cheng 500 lawih chawiin darkar khat dawn vel tho hun i han hmang ang a. Public transport system hi PPP em ni kan neih dawn kha? kan ti rilru leh neuh neuh ang a.

PTC ka han tlan pel chho ang a, RV a lang thei maw tih velah khan failed governance tiih rilru ah a lo lut leh ang a. Khaw chhung kan han thleng ang a........ ngaihtuah chhunzawm tawh rih lo teh ang!

Ka ram riangte hi ka hmangaih ka tih chuan mifa ten hmangaihna mawi taka an lo hrilhfiah sa chu ka dah nil dawn tihna a ni si. Eng ka ti ta nge ni le???

Lentupui kai vel leh romei chhumin,
A bawm kan Zoram nuam leh duhawm........................................................





Apr 7, 2010

Mizo zia rang

Thil pakhat ka vei em em mai hi a awm a. Chu chu mihring zia/ nunphung hi ani. Mimal chanchin online a pho chhuah loh hi finna an ti fo na chu, keima chanchin ai mahin Mizoten a kan chindan phunga kan neih tha lo ka ti deuh mai kan sawi lang ve mai mai ang e. (Mizote tihdan phung kan ti ngial na a, finfiahna erawh ka nei chuang lem lo!)

Pu te lawm hi hnaah chauh nge i hlawh a behbawmah?

Hna chu kan thawk taima. Kan thiam ber kher lo ang. Amaherawhchu, kan theih ve ang tawkah ber nih kan tum ve fan tlang pui. Vai kan tihte phei hi chu lehpelh hram hram kan tum thin. He zia hi chhungril taka CHAPO zia a ni.

I hna mai piah lamah extra-curricular activities lamah pawh i thiam, talent i dawng. Mahse i talent dawn te peipun a lo huna, hmalama ke pen chhuah a lo hun chiah hian "Ka ti ve thei tawk tawk" "Ka thiam lutuk lo" "Ka ti ve thei mai ang" tiin inrintawkna tlachham zetin i thawhpuite emaw, in pu te i lo chhang ve tawh a nih chuan INNGAITLAWM zia, Mizote zia i nei tihna.

I chanpual liau liau, i tan a bel chhunga sa ang mai a i hma a rawn tla tawh vanneihna i dawng a. I thawhpui tu emaw in pute be tlawnin emaw i hnenah lo kalin a rawn vehthlem che a. Nang chuan "Hmm... ka ai chang mai rawh" emaw pu te hnenah "Kei ai chuan a ni hian a dawng zawk se" i lo ti ve zan tawh thin em? TLAWMNA nun zia, Kristianna der nun atanga i dawn kha i pho lang tihna. A chhan chu maw, kan rilru mil miah loh pawh ni se, mi hmai eng zah vang leh tlawm zawka tan hreh loh lutukna a zarah he zia i paipawn kha a rawn langchhuak ta thin a ni.

Hna i thawk tha. Pute pawhin an fak che. Kristian i nih i zahpui lo tan a. I awm i han ti pharh tan vel chiah a. Nikhat chu hna tha taka thawk ni a i inngai kha an rawn sawisel ta tlat mai a emaw, i duh aia tam hna i dawng ta thut mai a emaw i ngaihdan ni lo zet mai khan i chungah miin an rawn ti ta a. I kum tel hnathawh that rah hre chang lek lo in pute mah ni se, mi hmaah i ankhum hrep emaw i palzam khum ta chiam mai a nih chuan Mizo fa dik tak i ni ngei tihna ah ka ngai!

Hetiang hun a lo thlen hian a chunga kan sawi tak zia hi a rawn lawr ta thut mai thin a. Eng zia ber nge hman tur kan hrethiam ta thin lo a. Kan sapatal ta chiam mai thin hian Mizote hi khawvel ram zau zawk kan vahna ramah hian dinhmun sang chelh aiin emaw kaisanna kawng inhawn tir ai chuan mi hnuaia rim taka thawk a, kaisanna kawng in hai ping thei tawk tawk ZIA, nghet lo leh mumal lo zet mai kan in phuar beh tir ni ta berin ka hria.

Dik ve tawk, hre ve tawk, thiam ve tawk, hmu ve tawk, ngaithla ve tawk leh tel ve tawk tawh nia inngaihna zia leh krista tlawmna nun, pipute tlawmngaihna nun, thudik ngaina nun zia kan chawhpawlh thiam tawk thin loh vang hian kan hmakhua kan sial thiam ta thin lo ni berin a lang.

Kan mizia hi a nghet in ti nge a dawrawm? 





Jan 11, 2010

An va hlu em!

Kumthar kan lo chuang kai leh ta reng mai. Hrisel tak mai leh dam veh vawh a kumhlui mahni te chauh mai a han thlah chuan an lo va hlu em .....! Hriselna tha min pe tu chungah lawmthu kan sawi hmasa ber teh ang.

Kei, thlarau mi em em lem lo leh tawngtai na lamah phei chuan chhungte leh thenrual thate tawngtaipuina rinchhan ti tih pawh hian mi fate leh nu leh paten harsatna an tawh zinga hrehawm an tih ber mai natna leh hrithalo laka him dam tak mai a kumthar ka chuang kai leh thei hi lawm lo thei ka ni lo. A va hlu em!

A pahnihna ah chuan kum hei leh chen mahni in lo tei rawlai ve tawh thin mah i la, masi boruak leh kumthar vuak vetah hi chuan mahni IN lum ngeiah ka hmang ve hram thin. Tlangval a pumpa han in ti ve thin teh mah i la, mahni te chauh mai a urlawk zan leh kumhlui thlah zana vai thiante zawng mai biak tur an han awm chuan an lo va hlu em.....!!!! Chhungte leh thenrual tha te..... an lo va hlu em!!!!

Inah haw mah i la, he zan hnih kherah hi chuan ka leng chhuak ngai lo. Chhungte be lem lo mah i la, an kianga awm lo nawm zia kha vai bula han men kar mai chuan a lo chiang duh khawp mai. Mahni tein Bethlehem han thlir dawn i la, "A lannna mual dang a awm si lo" tih ang deuh khan, a awm lo nge hawina lam tur ka hre der si lova. Tukverh hmalamah dak chhuak i la, lawng chawlhhmuna dinna chang lo lawng thir chakai thlaka ding eng chuah chuah bak hmuh tur a awm si lo. Hnung lam balcony ah dak chhuak i la, khawpui in sang tak tak karah zan dang ang bawkin a eng dul ruih mai si a.

Ka khua te hi a rukin a har veng veng reng a. Phone han hmet dawn i la, zan tantirah chhungte chu ka be zo fel diam tawh si a. Tawng duh ve tak mah ni i la, chhungte bulah hi chuan pa tawng tlem tak ka ni ve tlat a. Sawi tur ka nei tawh mang si lo va. Tih tur kha a va han awm lo lulai leng teh reng em! Mahni te chauh mai a han CRP mut ngawt kha chu ka tlawm la ve deuh si a. Sandman a ten an lo hria ang tih kha ka hlau ve deuh bawk si. Dar 12 chu ka meng thleng ve ta hram a.

Amaherawhchu thil hlu pahnih ka chhar chhuak ve thung a. "Chatuan rohlu" ka chhar ta em tih erawh ka chiang chiah lo na a, hriselna tha leh chhungte, nu leh pa unau duhawm tak tak min pe tu Pathian chunga lawmthu sawi lo thei ka ni ta lo a. A theih anga tawi chuan kan tawngtai hram a. Ka mu ve ta a.