Dec 31, 2009

Kumhlui thlah nan...

Facebook leh Orkut lama thiante chuan ka phone bo thu in hre tawh ngei ang a. Nokia Xpress Music 5320 kum khat lai ka lo chul nel ve tawh chu ka baat dei thilpek ah rel ah min ruksak daih mai a. Tun thlengin phone pawh ka la nei leh lo zawng a nih hi!


Kumhlui thlah nan ka phone hlui bo ta atanga ka thlalak thenkhat ka han post ang e.


Champhai


Kan in atangin Champhai zawl


Lalmawza


Champhai a kan thenawm naupang Lalmawza a a nih hi!


Khawdur


Chunglam power nih duh hmel :P


Bottle


He thil hi ka harh hmeh/lak a nih hi


Sea


Arabian Sea li thuk lamah


Mumbai khawdur


Independence Day kha min ti hre chhuak!


Tlai ni tla


Kum tir Goa kal haw lam ni ta in ka hria


South mumbai Building


Hei hi July thla Mumbai a ruahsur uluk lai a, ka awmna atanga ka lak a ni a. RBI ho building a ni


Zial bur


Kum thar a tan hetiang zialbung bawm hi ka bulhnai ah awm lo thei se ka duh hle :P



HAPPY NEW YEAR!!!

Dec 12, 2009

Haihawt nge Hai hawt?

Haihawt nge hai hawt kan hriat der loh chu le! Eng zawk zawk pawh chu ni ta se la, ka ziah tum awmzia chu thil chin chang hre ve awm tak, en mai chuan pa ti khek khawk, ngelchek ve hmel tak ten a an hriat reng tura ngaihte an theihnghilh fo thin ang chindan hi ka ti mai.

Tunlai chu ka HA PUI ka check deuh reng mai a. A lo la kim ve biai bawk si a. Enge maw ni teh reng ni ka hriat reng thin te hi kan theihnghilh tlat zel mai a. Ka kenlai a bo thul, ka dah that a lo awm lo thul! Rilru a hah thin phat phat khawp mai. Tunlai kan ti ngawt a, a lo in tan dan ka han chhuikir dawn a, ka hre chhuak zo ta hauh lo mai a. Hmanlai atang tawh khan thil hi ka lo hrereng thin lo hi a ni zawk a.

Haihawt han tih hian haihawt satliah, inthlahdah vangin a ni thei a. A dang lehah chuan haihawt tak zet, hre reng chung pawh a theihnghilh ang chi hi an ni awm e. A eng zawk hi nge ka nih ang aw tiin ka han in enchhin vel a. Ka hrechhuak zo leh ta tlat lo mai! A va han buai thlak thin em :P

Ka naupan laia ka thil tih bo chungchang chu sawi lo mai i la. Tun kar kalta chhunga ka hriat reng loh rah thenkhat te ka han thailang mai mai ang e. Pakhatna ah chuan, thawhtan kalta khan Office-ah ka chabi bawr ka ak a (tih dan pangai in). Tlai ka office bang in ka thlenga, ka locker ka han hawng dawn a, ka han in dap a, chabi chu ka hmu zo ta miah lo mai a. Rang mangkhengin office-ah ka tlan kir lehnghal a. Ka thleng fel te te a, ka han inngaihtuah tak tak mai a. Ka tihbo lai awm reng reng chu ka hre chhuak zo ta lo a.

Lunghnur zetin ka haw leh a. Kal kawngah chuan ka inngaihtuah chhuak thut mai a. Ka tlan let leh a. Ni a ka hriat hmunah chuan a lo awm der si lova. Kha hmunah khan ka chabi chu ka kut zungchalah ka vir kual tir chiang tih ka hrechhuak ta a. A bak chu ka ngaihtuah chhuak zo ta thlawt lo va. In ka thleng a, locker tala ka vuak chhiatna lamah a locking system ka vaw chhe tel a. Tun thlengin a kalh leh theih ta lo va.

A tukah chuan rilru a chabi bawr hre reng chungin ka office a (Ka chhu chhe tawh tih ka theihnghilh a). Lunch ei tura haw pahin Russian ka thlah a. Kan in bye bye a. Ka room ka lut chiah chu mobile hi ka lo ak leh tawh reng reng lo mai a. Office ah bawk chuan ka tlan let leh a chaw pawh ei lo in. Kan call a, 'out of coverage' la inti zui. Office ka thlenga, tumahin an lo hmu si lo. Kan dial nawn leh kha a ri ta rang rang a. Russian pa khan a lo pick up a. Kei in ka sawi tum sawi thei hek suh, a nin a sawi tum sawi thei hek suh. 'Niat, niat, niat...' 'Daaa' kan ti chhen mai a.

Thla thum zet nileng lengin hna kan thawk tlang ve tawh a. Hmun leh hmunah chuan zaizir nen kan inbe ve thei tawh viau a. Telephone chuan zaizir kha hmuh phak ni tawh si hek lo le. "Mr Gregory, ka mobile..." kan inhrethiam tawn a ni. Mah se kan sawi thei si lo. Mobile chu a bo lo phawt. Mah se, kan pahnih inkarah khan daidanna thuk tak a awm. A ni pawhin sawitur a ngaihtuah lai khan a rilru chu a hah ve khawp ang te ka ti vel ta mai mai a.

Vawiin weekend tanna ni ah hian kan che chhe leh a nih kha! Office-a kan special technical spares thil dispose dan turah procedures pangai lo deuh a kal a ngaih avangin kar hnih chuang kan buai tawh a. Concerned authorities lamah zawt chiang turin correspondence letter pakhat hi ka zing chhuahpui a. Ka tih tur chu ka ti zo fel vek. Office lamah pawh report ka pe fel vek tawh a. Lunch ei khamah' afternoon ah ka rawn zawm law law mai ang' ka ti fel ve et a.

Lunch ka ei kham ka thianpa Mizo pakhat Mizoram lama haw tur hian min rawn tlawh a. Kan ti ti luam a. dar 2 a ka kal leh tur khan ka tih thin dan pangaiin ka rilru te te in 'check off lists' chu a han tick keuh keuh a. Ka letter ken kha a awm ta miah lo mai a. Ka han chhui kir leh ngat ngat a. Ka tihbo lai awm reng reng ka hre leh ta lo mai a. Original ngei kha ka keng chhuak ve bawk si! Rilru a va han hah duh tak em!

Letter ka kuta ka ken hnu hnu ber awm vel lai kha ka hriat theih tawh loh avangin ka kalna office ho kan fang nawn leh a. Khawiah mah chuan ka hnutchhiah si lo va. A pawimawh lo zawk ka thil va copy ho chu ka la hum ran mai si a. Thlan a bawl tak tak mai maw le. Office-ah chuan kut ruakin ka let leh ta a. Ka boss ve ber lah chuan kan HOD a hrilh nghal vat a rang mangkhengin! Tih ngaihna awm tawh hek lo le... "I need that letter now" lo ti hmuk tawh mai bawk si. Ka boss chuan va zawng leh rawh a ti a. Mahni tih bona leh tihbo lai hre lo na na na kha chuan han zawn vak ngaihna awm hek lo le. Inah ka haw a, ka mu daih a sin le! :P

U a ma rim nam tan tawh vang te pawh a niang! "D

Dec 4, 2009

Night Club-ah ka kal ve a

Mizoram pawnah kum hei leh chen ka awm ve ta a. India ram khawpui hrang hrang bakah fawren khawi khawi emaw chu ka kal ve nual ta a. Club leh Discotheque velah hian ka lo la kal ngai reng reng lo mai hi a lo ni a. Cinema tak ngial pawh en ngai lo khan Club ah ka zan kal ve ngei kha!(0n 3rd Dec 09) Lifetime Achievement....

Mizo ngei perform tur chu tiin thianpa MBA a nen kan va in lan ve a.
Place:Blue Frog
Time: Before 9:30 ( a changtupa in free a min hruai luh dawn a vangin ! :P)

A hmun a biru phian a. Night club han tih khan kan ngaihdan hi tlemin a lo danglam deuh nge ni, ka kal hma lawk a ka thian biak chuan, "Night club ah a....?" a rawn ti ha mai a. A hnu lawk a ka message dawn ah chuan ti hian a lo in ziak a -'Kal rau rau cuan enjoy yourself'.

A hun hma deuhin kan thleng a, kawtah chuan zial kan lo pak khu laih laih a. A rawn kal reng reng kha car sial deuh hlir mai hi an rawn khalh a. Kawt laiah chuan car chu an ti ding a an kal san ta mai zel a. A sawirem tur kha an lo duty khiau hi a lo ni a.

Chhe lo fe fe, a then mawngbawr fuh zet mai, a then zen ria thlerh thlawrh, taksa inphut zaih mai leh hmel han en reng reng a angel hawlthlak iang ngawih ngawih mai rawn intheh thil karah chuan bing ve tirh terh, kir bap mai, meng dum ham leh mawng poh ve tak tak pawh an bang chuang lo a.

Rei kan din hma chuan BMW dum zan mai hi a rawn tawlh zal zal a. Kan hmazawnah chuan a ding ta chaih mai a. A perform tur te kha 3Tenors ho an ni a. An zinga pakhat chu Mizo tlangval ngei a ni tlat mai. A rawn simat khawp mai a. Entrance lam panin kan inzui phei ta a. Min lo check uluk khawp mai a. An tih dan dan a awm chung chuan lehlam pang nula chu ka lo la thlir hram pek a.

Kawngkhar kan lut tur chu kutah hian stamp an lo chhu kauh kauh a. " A ho mai mai" tih pahin ka lut tlang ta daih mai a. A hnuah chuan zial zu a chhuah duh pawhin khami tello kha chuan a luh leh theih tawh dawn loh hi a lo ni a. A hranpa ngatin ka va chhuak tha leh a. Utawk pawl lem chu ka va chhut tir ve ta kauh a.

Ka han hawi vel a, kan luhna ah chuan kum 40 chunglam hi an khat thup mai a. Chhe lo zet zet ho kha a bul zawkah an lo lut chu niin! Kan hmelhriat ve berin stage lam min pansan tak ah chuan kan hawi ta lawl lawl mai a.

Ka thianpa chuan pawnah chhuak leh lawk teh ang. "Ei leh in tlem in thun puar teh ang" a ti a. A chhan chu "phur deuh hnuah chuan riltam chi loh" hi a lo ni a. A lo to phian ni tur a ni engkim mai kha a chhungah kha chuan :D

An han zai tan tak tak a, Oh! Darling, Love hurts, Without you leh Welcome to the Jungle tih te chu kan thian a chuan a rawn sa a. Mipui thawm a tha khawp mai.

Leh lam group an tha zawk bawk a, midang zai kha chuan pawnah kan chhuak sek mai maw le! :P Chutiang a pawnah zial kan peh kawh tum khat chu vai pakhat hmel hi ka hmuh hnu ni tlat hian ka hria a. Vai filmstar tenau pakhat lek chu lo niin. Ka thenawm hlui emaw kan tih pek chu (!) he he

Lam chi ka lo ni lo kher chu pawi khawp mai. Sir han sawn pui tur an that hiu hiau nen maw! Phei khai i vawr dun ang tih chakawm fe fe an kat nuk mai a lawm. A rei tawlh tawlh a an phur tawlh tawlh leh nghala. Dar khat a lo pel der mai a.

La zo chiah lo mah se haw zai kan rel ta a. Ka hlawhtling khawp mai. Zing takah ka mu a. Ka tho thei ta lo a. Niin min chhun harh zawk a. Bak phelengin ka tlan chhuak nghal a. Office chu ka tlai ta tho a. Mah se, a phu e. Night Club vawikhat kal ve man a, a tuk office han tlai ve reng reng kha!

Zawngchhang chi a nih phei chu ka hre hran lem chuang lo :D

Nov 11, 2009

Advance Christmas

Kumin x-mas chu vairam ka awm hnu a masi vawi kua na tur chiah a ni! Chutih rualin vai ram lamah erawh tum hnih chiah Masi hi ka la hmang thung a. Kumin chu ka in ngaihtuah lungleng thut a, vairam ah Masi hman ka tum a.

Kan upa tual tual a, masi te lah chu a ho tual tual leh nghal a. Advance Christmas hi an hmang teh chawk a, kei pawh hmang ve teh ang tiin Zoram lam ah thlakhat chuang ka han hawi hai a.

Kar khat kan khuaah ka cham hman awrh a, mithi pasarih kan nei hman. Heng zing a mi pitar pakhat tih loh chu kum 40 hnuai lam vek an ni! Chakna avanga kum 80 pawh ni thei kha a zatve ah chakna avang bawkin kan pawt tawi ta anih hi te ka ti vel mai mai a. Khawhar chhungten lo haw lo se la, heng mithi la thalai tak te hi ruih theihthil ngaina tak an ni deuh fur lehnghal a. Engtikah tak khua var ang maw?

Ka han cham chhung hian ka thianpa pakhat chu zeng thut natna, vung atang a in tan hian a lo awm ve a. Kan thenawm hnaiah khatiang kha panga lai mai an awm a. Zu in mi an ni deuh vek lehnghal a. Ka thianpa pawh," I zu in vang a nih kha!" te ka tihsak vel ta mai mai a. Daktawr ka nih loh avangin zu vang chu ka ti bik chiah lo a. Kan unau zinga upa ber dawttu, kum 20 lai mai missionary pawh a vung ve tho mai bawk si a. :P

Advance masi ka han hman chhunga ka sawi hmaih hauh loh tur pakhat leh chu ONLINE a ka thiante, a hran taka ka biak lem loh pawh an thil ziah ka lo chhiar fo tawh thiin te nen chaw ei khawmna hun te kan han nei thei a. A hlimawm dangdai khawp mai. Kum lamah erawh ka phalo na a, an kianga awm a nuam ngei mai!

Ka hun a tawp a lo let leh a hun ta a. 8 Nov khan ka thlawh ve na tur an cancelled daih mai a. A ai hmain ka chhuah phah ta a. Imphal lamah kan kual a. Kan thlawhna chu A va chhe ringawt mai a. A zan Kolkata atanga rel a chuang tur kha Manipur lamah kan riak ta ngawt a.

A tuka thlawhna chhia repair chawp a chuan chu a nuam duh lo khawp mai :P Ka neih nun vang ni hran lo in hna lam zawm angaih tawh si avangin Kolkata atanga Mumbai chu ka thlawk ve leh ta ngawt mai a. Chawlh in hmang da haw lam tan chuan a tih chi loh ngei mai! :D A tawpah Mumbai khaw chunga darkar chanve dawn kan vir kual hnu ah Mumbai chu ka thleng ve ta a. Ka Advance X--mas chu a tawp ta a. Mumbai lama Masi rawn hman tum te tan ka in hawng a nih ber mai chu !!!!!

Aug 31, 2009

Hna hi a awm lo nge kan zawng lo

Hnathawh tur hi Mizoramah hian a vang tak tak em ni?

Post Graduate meuh zo tawh hian,"Hna hi a awm thlawt lo a ni, khalamah hnathawh tur minlo zawn teh" a rawn ti a.

"Vawi engzat nge interview i hmachhawn tawh, eng hna nge i apply ve tawh a?", ka ti a.

"Hetah chuan hna dilin awmzia a nei lo, tihpuitu ka nei ve hlei nem. Dil mah i la ka hmu chuang lo vang"

"Vawi engzat nge interview i hmachhawn tawh ka tia lawm?", ka han ti leh hram a.

"Hna dil chuan ka la interview lo" tiin min chhang dul ta raih a.

A ni dawn tak e. Kan ramah hian hna hi a vang em a hna zawng tur leh dil tur pawhin opportunities (chhum thim piah lama kawl eng) kan hmu pha ta lo niin a lang. Hetiang mi hi kan tam tawh lutuk a. Kal ngaihna hre lo, sawrkar nge dem tur mi thil ti thei tih pawh hre hrang thiam hlei thei tawh lo kan kat nuk ta ni mai hian ka hria a.

Kei pawhin tunge dem tur ka hre chuang bik hauh lo. Amaherawhchu, "Khawnge ke kan pen ve phawt anga, kawng laka hling leh kangthai te chu ka han hmachhawn teh ang" ti ngam thalai kan awm ta lo hi chuan kan zirna inpui (education system) leh sawrkhar ka dem rual rualin Siamtu in a duh leh duat taka Amah anga a siam, chhia leh tha hriatna a peka te hian kal ngaihna kan hre lo hi chu Keimahni hi ka indem lo thei lo a ni.

Keimah ah ka han inngaihtuah chhin a. Khawvel mite thiamna tehna lamah chuan pawl sawm pass degree zawng ka nei ve a. Tunah hna tha thawkin hlawh tam tak nen nuam ka chen e ka ti hauh lo. Amaherawhchu ka kalkawng ka chhui let hian vawi engzat nge mahni ke a ding tura ka beih a, ka chhungte chu sawi loh ka nu leh pa ngei pawh hrilh lo a kawng ka zawn thin dan kha ka ngaihtuah ve mai mai thin.

Chhungkaw harsa taka seilian mah ni ila, te ber nih manah ute ho Champhai zawl a inhlawh chawpa uniform man an tuak thin dan te chu ka thawnthu ngaihthlak ve mai mai thin a. Amaherawhchu ka rilru takah chuan,"Ka ke in ka la ding ve thuai ang" tih hi ka sawi nawn ka sawi nawn thin.

Septic tank paiha Aizawl a ka inhlawh thu sawi ka tum hauh lo. Pawl sawm ka pass hnu chanchin ka han sawi ve mai mai teh ang.

Pawl 11 ka nih hian lawng sipai hna ah ka tling ve hlauh mai a, sipai nih hi ka tum ngai loh avangin ka thulh san ta a. 12 ka zir laiin Future Vision Advertising Agency ah khan ka va interview ve leh tawp mai a. Mizo medium a lehkha zir zo ve ngat kha saptawngin ka va tawng ve bauh bauh a. Hetah erawh hi chuan ka thawk rei peih ta bik lo a.

Hetih lai hian Aizawlah ka u ten min chawm a, ka pa chuan civil services lamah lehkhathiamlo mah ni se mi hi a sawi hmuh ve thin a. Mah se, keimahin ka inchawm ve phawt ang tih rilru ka pu ran thin.

NDA ka exam ve ang chu tih beiseiin exam theih ang ang chu ka apply ve phawt zel a. Airman technical ah ka tling ve leh mai a. Lawng sipai pawh kan exam ve leh chhin a. Ka tling ve ve leh ta a. Vanduai thlak takin kum ka ruk then duh loh zarah NDA ah chuan ni 3 in ka kum a lo over ta si a. Lawng lamah ka classmate tling ve te an awm ve nen nu leh pate thu zawm zo lovin vai ram lam ka pan ta a. He tih lai hian kum 17 chauh a sin ka la nih!

Hetih chhung zawng hian ka thil tihah ka hlawh chham ngai lo. Hna ka han thawk ta cheng a, hmasawnna kan lo duh a. Officer kum thum ngawt mai ka bei leh ta a. Vanduaithlak tak bawkin a tawpah ka tling zo lo leh thin a. Tum ang chuan thil chu a kal ta duak duak hauh lo mai a. Mah se, ka bei ve phawt a ni. Khatih hunlai khan thla 6-8 vel tuifinriat lamah ka pil bo thin!

Eng vang a sawi nge ka nih chiah chu ka hre lo na in, ka thil tihna kawngah kawng sir atangin ka thlir mai mai lo a. Ka tem chhin ve phawt thin.

Sipai lubawk ka nih laia ka la hriat reng mai chu Cochin a ka awm laiin tlangval pahnih Cochin University a zir tum hi ka leave haw lam nen relah kan chuang dun a. Unau an lo ni a. A nau chu Chennai lama BA zo tawh hi a lo ni a. Mizote kan lo in ngaihtlawm zia hi ka ti thin.

Admission an lo khar tawh si a. Min buaipui thei lawm ni? tiin min han pur ve deuh a. Pawl sawm pass nih khan awmzia a nei tawh lo. University Registrar thleng chuan ka be kual ve ta vak mai a. An fel khawp mai a. Mah se, deadline a pelh miau tawh vangin kei pawh chuan eng ka sawi chhuak ta bik lo a. Mi biang biak kha zuk han hreh tlat a maw le?

Amah chu mifel tak a ni a. Hmanni ah Orkut ah min rawn invite a,"Min la hria em? Switzerland-ah ka awm tawh a" tiin lawmthu min rawn hrilh mai chu a lawmawm ka ti khawp mai.

Ka thalai pui tam tak ten a, hna avang, engmah beisei a awm lo ti a mahni in kila an tawm thap mai han hmuh hi chuan ka thin hi a khei thin mang e. Eng hna nge thawh tuma i beih ve tawh? Eng thiamna nge zir chhuaka kan inhriat a mi kuta kan la innghah tlat a, kan politician te kan lo dem ve em em ngawt zel le aw! tih hi ka ngaihtuah thin.


Aug 13, 2009

Zalenna kan tih hi eng chen chiah nge?

Lal thuhnuai a awm peih loin khawvel hmun hrang hrangah helna a chhuak a, an lalte an paih thla a. A aiah mipui rorelna, mitinte intluk tlanna leh zalenna kawl an tih chu a lo eng a.

Mihringte hi awp beh do ngar ngar ti i la kan ti sual tam pui awm lo ve. Lal thuhnuaiah chuan Lal duhdan ang khan rorelna a kal mai a. Amaherawhchu, lal fing leh fel chuan a mite duhdan in ro a rel thin.

Ram, hnam, khawtlang leh kohhran/ sakhua in kalphung inenkawl dan kan nei pit pet a. A tlangpui thuin mipuite hamthatna beiseina nen dan leh dun te zam a ni thin.

Kan tunlai khawvelah zet hi chuan mipuite hian mimal duhdanin kan rel ta nge ni a, mitlemte duhdan kalpuiin zalenna, mimal zalenna hmingin duhthal a inlu lin vek kan tum ta pawh ka hre thiam chiah lo e kei mimawl hian.

Chennai a college pakhatah chuan T-shirt nghawngzau lutuk hak khap a ni a. Ram pum huap deuh thaw in demna thuin a deng zui nghal a.

India ram school thenkhatah mobile phones hman khap ani a. Nu leh pa te thlengin, media ho zarah, kan fate mobile tello a an khawsak theih loh zia kan tlangau pui leh a.

Tun hnai te maiah khan Tata Institute of Social Science (TISS, Mumbai) ah chuan hostel a awm hmeichhe tan zan dar 12 leh a chanve pelah khawilai vah khap a ni a. Zirlai leh zir chhuak tawh ten media lamah Institutes authority an dem leh chiam mai bawk a.

Nikum lamah Pune a farm house pakhatah thalai rual 200 chuang zet mai party chu police ten an man khawm thut mai a. Jail an han pan diah diah chuan kan social activists ho leh nu leh pate (mi lian tak tak te) chuan, "Police hoin an kuang lo an nawr ani, tih loh tawp tur an ti a ni" an tia. An au ring leh hle bawk a.

A dang pawh a la tam ang. Kei ka zawhna ve chu zalenna, mimal zalenna kan chawisan em em hian eng chen chiah nge maw a huam le? Khawtlang leh mimirin tha, niawma kan ngaihbak pel te leh zel pawh hi mi pahnih khat lek vangin pawmzam theih leh en mai mai turah kan chhuah zo dawn ni te pawhin a lang ta e.

Roreltu tan hian a luhai thlawk dawn thin mange aw!!!! Min venghim turin kan duh si, kan tana tha turin kan duh si, mah se a kalkawngah lo awm palh i la kan kher leh nger nger lawi si hian ngaihtuahna a ti thui ka ti thin.

School kal ni na na na khan T-shirt nghawng zau em em hak kher kha atul em? Mobile hi India a rawn luhna la rei lo a sin, naupang lehzel chu a telloin sikul chhungah na na na chuan an awm thei lawm ni?

Zan taireka khawpui pawna ruihtheihthil nena party luih luih kha dan hian phal ta se la emaw kan duh dan dan hian awm i la chu a au ring tur tura chu keimah ni tho hi kan ni ang em?

Hmanni lawka zirlai zanlaia thiantena an pawngsual laia sikul mawhpuha dem chiam chiam tu te khan an lo him theih zawk nan zanlaiah chuan khawlai tei suh u tiin zirlai te kha thu lo pe ta pawh ni se la enge a pawi vakna awm? Kan duh bera chu zirna kha a ni mai a. Zanlai pel pela zirlai leng chhuak fate hi kan nei fur duhin ka ring lem lo khawp mai kei chuan.


Kan mamawh leh duh te hi a va han chiang lo tak thin em! Tun thleng hian kei zawng thil chhia leh tha hi ka la man ve tak tak lo a ni e.

Aug 5, 2009

Misual.com vangin

Thil ziah tur i han ngaihtuah a, i rilru in a thupui tur i han tin zawn a. I lehkha phek i han phah a, i kawlawm i han lek kang a. Tlar khat, tlar hnih,..... para khat ah a tawp zel mai bawk si a. I ngaihtuahna i han sang phek a. Engmah a lo luh belh chuang bawk si lo.

Eng tin nge i tih tak ang le?

Hetiang dinhmuna din lai pawh hian Misual.com han hawng i la. Pu mzvision te, Lily_Parmawia, Xaia, Pi Irre, funny te leh Pu Zorunpuia te ho te, Pu burgerstud2005 te, kanidar te leh misual sawi a sawi hmaih chi miah loh Aryan a leh Pu H.Vangchhia te ho han hming indawt thla a han hmuh hi chuan nun khawharna zawng zawng hi a reh ta duak thin a. Kan khi khi mai thin zawng a nih hi maw ziah tur leh comment ngaihna hriat ve miah loh pawh hian!

Ma thei lovin nitin ka misual ziah thin a. Eng em em sawi tur hre ve mah suh i la, mite zarah kan hriatna erawh a pun ve hret hret loh pawhin ngai chu ka awh reng bik lo in ka hria. Tisa takin mi ramah cheng rih mah i la, he misual.com hian rau-in (eng rau nge phei chu ka hre law!) kan ngaih Zoram lamah min chen tir delh delh thin.

Mi chuan website dang leh blog hrang hrang atangte in an rawn thawh khawm thin a. Kei erawh zawngin Misual.com a tun hnai a topic thenkhat a ka comment na ka rawn thai lang mai mai teh ang.

Sex hian min awp bet ta mai em?

#12 : “Keini zawng kan hmuh leh kan hriat te hi sawi lo thei kan ni lo” tih ang vel a ni e. Kan hmuh ve reng si a, kan hriat ve reng bawka kan chhiar ve reng bawk si chuan kan sawi ve mai loh nakah. Kan sawi kan sawi te chuan kan ngaihnep loh nakah! Kan ngaihnep te hi chu a nung emaw a nunglo emaw kan kalpah mai mai thin zawng a nih hi maw!

Congress kan sawi luai luai a, kan ngainep chhunzawm a. MNF kan sawi leh luai luai a, kan ngainep leh zui mai bawk a. Sakhaw lamah pawh chuti bawkin. Rawn lar hluai leh mitin ka luah tu hi chuan sawiselna an tawng leh thin a nih hi maw! Kan hriat ngai miah loh leh kan la chenchilh loh thil mah kan ngai nep leh thin si a. Hmasang a ta tawh kan lo tih ve thin hi chu, ngaia neih chin te awm ve bawk ang chu!

Hmanlai ah pawh khan lam hla takah awm bo ve in, nula leh tlangval awm no tak tak eiin tha bawk si kha inngheng rial hian pindan inep khan lo mu ve thin se la emaw hmanlai khan TV ah te khan mi inchuks leh inthepthual vel kha lo thlir lo thlir ve thin se la chuan thil thianghlim tawntaw ah chuan an lo ngai bik kher nang! Sawn thlaka cheng 40 chawi kher ngai lo khan sawm li aia tlawm zawk leh tlang than ngai lo mum ei tur te kha lo zuar ve tawh se la chuan an ti ve thin tho lo maw?

Khawvel inher danglam hi hriatthiam chin kan nei ve dawn lawm ni? Nge ni a, vairamah zu zir ta la, thil tha chuah rawn zir chhuak ang che aw tih emaw internet ka pe che ang a thil bawlhhlawh chu en suh ang che aw ti ringawt la vairama i fate nungchang i hriat loh leh room lehlama i fapa/ fanu in enge a tih thin tih kha i hriat si loh chuan emaw hre reng chung pawh a zirtirna tha i tuh theih si loh chuan heng te chu kan hmachhawn tur a ni lawm ni?

Hmasawnna zawng zawng hi tha vek mah se a hun lai a zir a ngaihtuah nawn ngai te pawh a awm ve bawk. Hmasawn hrim hrim duh a, thil dang kan hmuh kan thin hian hmasawnna rah peng thil tha lo a rawn keng tel ve reuh a. Kan lo la inrin si loh chuan min vaw let ta thin a ni.

Chhungkua leh khawtlangah zirtirna fumfe kan nei thei tawh lo zanwg a nih hi. Hmasawn duh luatah nu leh pa saptawng a mik a mak hre lo pawhin fate sap sikul ah kan han dah ve tawng a. Fate lahin sikula kan zir Mizo tawngin let thiam suh i, nu leh pa pawhin han sawi pui dawn ngial mah se tih ngaihna awm si lo. Chhungkaw inbiak pawhna hun tha leh hlu CHAW EI DAWHKAN kan kil ho pawhin mikhual awm khawm ang maiin kan thu liam ve ta mai mai zawng a nih hi maw.

Nu leh pa pawhin tih dan phungah neih ve kan tum mai a. Fate ho lah hi kan han lian deuh a, peer pressure leh environment a lo dang a, chhungkua a Pathian thu awih ang che tih chauh kha chu a lo tawk ta lo thi a nih hi maw aw…. tih hi kei misaul ngaih ve dan a ni.

Hmasawnna chu chhungkua atanga intan a ni tur a ni. Thenawmtena TV leh Fridge an neih vang ngawt a nei leh nei lo a kan lo ba thla ve zen thin te leh nitin inhlawhfa chunga computer nen a in hun ve phet kan tum te hi ngaihtuah nawn a ngai. Thil reng reng hi chu a tha vek. Mah se a hmangtu tur ten a hman thiam hma a a tharlam leh tha ber ber kan inchhawp chuan kan hman thiam meuh chuan a lo chhe hman tawh thin. Chuvangin second hand chhe deuh emaw atanga bul intan hi kan zir ve a tul tawh.

Sex a ni emaw, rel kawnga ni emaw, infra a ni emaw…. a in ang khat pet pet viau a kei misual hian ka hriat tlat chu le……


Tlawng Khuah leh Rel kawng

#7 : 2014 nghak pawh mai teh ang u. Hemi hma hian eng tin nge kan lo in ven fimkhur ang a. Pawn lam mite hnathawh dan turah te, an rawn ken luh turah te… sawrkar hian MoU a sign sa leh a sign leh tur thleng hian i khel tawh zawk ang u.

Hna tau tet tur hi keini aia mi dang hlawk pui tur an awm ang em? Hlawkna Zofa te chan ve turah hian a hausa leh awmthei deuh te tan chuah em ni?
Sairang thleng chuah a rawn luh dawn chuan…. hlawkna tel tu tur kan lo neitu te tan hian an khua atanga Sairang thlenna kawngpui te atha hman dawn em? Nge darkar khata km 10 chuah a kal bek bekin an thlen pui dawn?

Kan thlai thar ve te hi… cold storage leh packaging lam te thleng hian hnam dang mi kan chaw lut dawn em? Nge keimahni mi te ngei hian an chang ve ang a, chung mite chu pawn lammi te a puih thin ang tho hian sawrkar hian tax break leh power subsidy thleng hian a phal ve tho ang em?

Kan cottage Industries ho te tan pawh hian an mahni duhthal in an zuar chhuak ve ngawt dawn nge Sawrkar hian marketing lamah engtiang takin nge hma alak pui dawn tih te leh…. chuti ni lo hian khawi lai Marwari kal tlang lo khan a theih loh leh ang em?

Kan ILP te hi immunity fihlim a ni thei dawn ang em? Immigration problem lam te hi… engtin nge ni ang? Hausa ai mah hian rethei in min pur dawn si a.

Tuna, arms smugglig route kan ni mek te leh drug trafficking lar mek zel te hi hetiang a kalpawhna a lo awmsam tak hian eng tiang dan nge kan siam dawn? Assam ho dan kan hman na te hi a rei tawh in ti ve em?

Human trafficking pawh a lang ve ta zauh zauh maite leh AIDS hluar mek te hi he relkawng hian enge nghawng a neih ang!

A la tam thei ang. Chhun chaw ei zawhah chuan rilruah a lang kim vek thei tlat lo….
Kum 5 kan la neih chhung hian sawrkar hian heng isssue te hi a en dawn em? Rel kawng chuah ni loin ZOkhawthar International Trade Centre te, Koladan Multi Modal Project kum 2011/2012 a zawh mai tur te pawh hi i ngaihtuah tel teh ang u???


Hnam humhalh tum dan

#37 : Pawl zawng zawng hian tum an nei vek a. Ultimate goal ah chuan hnam humhalh leh nunze mawi chawisan ni theuh mah se kan kal dan a in ang hauh lo a. Mizorama pawl tam tak (political party tiamin)hi chuan branch an han din tawng a. An dinna lam ah khan enge an tum lam hi chu kalpah hian an sawi mai mai a.

Entirnan, MZP leh MSU te pawh school tam takah chuan inthlanna te an va buatsaih tawng a. An constitution tak ngial pawh chhiar chhuak lo kha hruaitu an ni ve leh mai bawk a. Khatiang deuh bawk khan pawl dang dang te pawh. General Conference nei eng ang mah se, an pawl thil tum vuana te chauh kha member an nih thin loh avang in an hmalakna pawh a hrang ta nuaih thin a nih hi.

Kan pawl din te hian a han huam zau thei laileng khawp a. YMA a vawite khat pawh thlan lai lo va, mithi lumen na a tlaivar lo…. kalna a pianga sawi chhetu leh kuang man khawn pawha pe tha duh lo pawh kha a thu chuan YMA member an ni tho zel mai a.

Hotu nih kan in chuh a. Nuam kan ti a. Hruaitu nih awmzia hi kan inzirtir lo reng reng. Hmanlai chuan Zawlbukah Val Upa te kaihhruaina hnuaiah an training tak meuh meuh a. Val Upa an lo nih ve meuh chuan an mawhphurhna an hai ngai lo. Keini ve chu kan lungawi lo a, pawl dangah kan pem a, kohhran kan sawn a.

Hei hi tunlai miten a kan hmaih len ber a ni. Hotu ni lo hruaitu chher chhuak tur chuan kha pawlah khan a inhnim phum ve a ngai. Chiah zeuh chauh kha a tawk lo. Va sawi hmuh a, lo kaihruai ve phawt la tih phei chu chi loh hul hual ani.

Kan NGO tam zawk te khi ennawn ngai tak an ni. Chhungkaw business te pawh a ang lek lek hlawm a ni a then hi chu. Director matric pass lo te, chhungkaw eizawnnan a hmangta mai mai te, survey tak ngial pawh nei peih mang lo, report mak sak tak tak thawn ta mai mai te pawh kan awm teuh nia. Kan tum hi kan thelh thin a ni.

Hnam humhalh tur chuan hnamah kan chian a ngai. Kan tobul leh kan pipute values and beliefs, a tha lo lai paih thla a atha lai chawi nung zel tur chuan kan hriat a ngai a lawm.
Kan member te tih lawm nan, ruaitheh, picnic kan ti awl lo a. KTP thleng hian “member kan tlem tlat, a happenings lo tlat, hawh teh u Bon fire i siam ang u lah khawlai mite pawh kan hip deuh mahna” kan ti ta nih hi. A hlimhlawp lai chiah chen a, a harsatna laia mawhphur tura sawm chhuah zawh loh tur member zui tu hi kan thahnem ta lutuk a ni e.

Thingtlangah MZP Branch i han din teh ang kan tia. Kan hruaitute khaw chengker tak takah an han zin chhuak a. Letter Head in thil a tih theih zia leh Aizawl lam hotute thu lo ngaichang tura tihna bak hi an hnutchhiah ngai tlat lo a lawm. An haw ta cheng a, an branch thar a hruaitu kha chuan zirlai zawng kha chu member ah a ngai ve hmiah mai a.

Letter head chu a siam tir ta ngei a. Sub- Division leh Dist. Hqrs office hrang hrangah kal kualin hna an han dil a. An dil hmu ta chenga zunin sa tur khan vai mistiri te kha an man khawm leh ta mai mai a. Hlep hlang a ni mai. Zirlai pawl hruaitu te chu zirna lama thiam tak leh hmalam hun beisei awm tak aiin a hminga admission ti ve mai mai, zir peih si lo mi ti ti zara a thawi a lo hre ve teuh leh sawi chhawng thiam tawk vela hawi harh kha kan hnut chhiah ta thin a. Hmalam hun kha a thim duh lutuk.

Member a te kha chian a ngai a lawm. Mizo ka nih vang ngawt emaw, kum 60 hnuai lam ka nih vangngawt e maw, a hminga kailo a sikul tala ka lo kal ve tawk tawk vang emaw khan eng pawl emaw member ka ni ngawt thei lo reng reng. He pawl hian enge a tum? Ka rilrem zawnga ni em? Emaw hruaitu te lam pawh hian tu tu te hi nge ni kan ngaihdan min tawmpuia, min tawiawm tute tih hi kan chhut a hun tak meuh meuh ta!!!

Ro em em lai pawh hian eng eng emaw ni hi chu Misual.com vang hian a mahin a rawn intum chawp fo thin! (Zo bloggers misual ve lo te tan.. hi hi.... hi hi!!!)

Jul 31, 2009

Ka tunlai khawvel

Chawlhni kalta khan Bible Quiz Mumbai Mizo inkhawmna a thalai pual a inkhawm ah ka buatsaih ve a. Hun a heh duh kher mai. Dawt sawi miah lo chuan Bible tak tak ka keu na kha a rei ve tawh ang reng a. (Duhlai chang chhiar turin mobile kan kheuh neuh neuh a, kan hmu mai tawh zawng a nih hi maw?)

Thianpa MBA a tih dan takah online zeuh a, download ve mai kha ka duh a. A ni chiah mangin ka hre si lo a. Mut mawh hnar mawhah a tang ve reuh a. Thil dang pawh ngaihtuah thei lek lo in ka buai pui a, midang khan an hlawk pui em ka hre lo a, kei chuan ka hlawk pui khawp mai! he he... (Sandman erawh a rawn inkhawm ngam lo!)

Zantin ka online ziah a, news hrang hrang ka lawrkhawm a. Thil chi hrang hrang ka thai kual a. Ka misual ziah bawk a. Ka mut meuh hi chuan dar tlemte a lo ri a. Zing ka han tho a. Ka edit leh peih lo a. A awm khawl ruih mai a. Hmanhmawh deuhin ka han chhiar leh hram a. Midang chhiarah ka sit deuh si aniang chu. Ka khawlbawm Folder-ah bawk an lut leh ta dial a.

Lehkhabu pawh tun thla chu bu khat ka sual chhuak tawk a ni. Governance and the Sclerosis that has set in tih Arun Shourie ziah kha ka chhiar a. Thil dang daih ka ngaihtuah a. Kan politician ho zet hi, an thluak hi a tha in an hriatna te hi a va han zau em? BJP deuh pawh hi an thil tawnhriat leh an duhaisam han ngaihthlak tak tak hi chuan secular dik tak hi an lo ni reng zel a!

Ka update hlei thei lo in hetiang vel hi ka rawn thai ta mai mai a. Ka blog ka han hawng a. Template ka thlak kual vel a, duhthu a sam lo a, ka thlak kual leh a. Title te ka thlak danglam a. Hei hi a ni e ka tunlai khawvel chu! Enge a post lamah hmasawn lo mah i la a lan dan ah chuan a dang lam zing ve tho a sin! :D

Hei kan office atanga khawdur kara ni eng set set ka clicked ve ka rawn share che u! (Mobile tang nia a fiah vak lo mai thei)

Jul 10, 2009

Sandman a hi tuai a lo ni reng a lawm!

"Beta, achhi ladki se shaadi karna," (Mate, nupui fel tak nei ang che aw!" ti a thlah lawm lawm thin nu leh pa te tan chuan,"Beta, ladki se hi shaadi karna!" (Mate, nupuiah chuan hmeichhia ngei nei ang che aw!)tih vawng vawng a ngai dawn ta anih hi!...... tiin ka vai thawhpui pakhat chuan min hrilh hlawl mai a.

Ka ngaihtuah vang vang a, "A ni thei awm mang tak e aw!" ka ti ta rauh rauh a. Tun hnaiah Delhi High Court chuan Indian Penal Code 377 na India Danpui kalh a ni e tiin thutlukna a siam bau mai a. Kar khat chhung ringawtin (after 2 July) tuai innei kawp sarih ngawt mai an awm hman der nia!

IPC 377 a 'unnatural sex' atih hian gay/lesbian chauh tan ni lo a mimal tin a huam avang erawh chuan repeal ngawih ngawih tlakah ka ngai a. Amaherawhchu, hei hi remchanga la a, tih dan phung chiah lo a nungte RIGHTS hup beh sakna dan ang mai a a kal hian ka khawvel thlir dan a ti dang lam ta a ni.

Pianphungin a a ken nge ni a mahni duhthu tih pawh sawi thiam a har tan ta. Mimal dikna rah beh sak an nihna lai tak hi ka hrethiam lo a. An chep tih hi ka pawm ve der lo mai. Relah i chuang a an rawn dap ngam che nia. An kutdawh dan te hi! Chubakah mi pangai pela nung hi an tam ve chiang e mai. Mi te hian an dawhthei ngawt zawk a lawm. Nun dan pangai pela, tuai pawh a tuai nihna pel emaw patil pawh a patil nihna pel a an nun chuan mi ensan an hlawh loh nakah! Khawtlangah pawh mi tih dan baka nung te chu tu ngaihsan mah an hlawh ngai lo.

Gay pride parade te kha... chanchin phekah leh TV ah te an in kuah vel! Inneih hial duh a te ho chu opposite sex an ni ve mai lawm ni? Chuti chung chuan police pawhin an man ve hlei nem! Mumbai ah hian i bialnu emaw i bialpa emaw...han kai chhin teh! An booked nghal che anga. Atukah court ah i inlan zak zak mai ang! Tunge chep zawk?

A reng reng thuah gay sex legalization ang zawnga a kal dawn anih te chuan nawhchizawrh te pawh hi phal ve law law mai tur hi a nia. An ni pawh a dawrtu nen te chuan 'puitling duh ve ve' an ni tho a lawm! :D

Ka lo tuai ve reng anih hi ka sep ho e mai! An ni hi lo innei ve mawlh mawlh teh se. Ka duhsak pui e. Amaherawhchu, newspaper leh TV ah hi chuan rawn lang chhen teh suh se. Rakhi Sawant i TV Show tluk zetin ka ning!!!




Jun 24, 2009

Passion and Ambition-Flashback

Nih tum, hei chu ka la ni ve ang mang lam tala i lo kur pui ve tawh i nei em? Tunah enge i din hmun? Mi pangngai tungchhoa kal tawh chin chuan midangte hriatah kan sawi lo a nih pawhin i lo mut bo pui ve tawh ngei ka beisei!
Chhungten neihthinglungkhawngin lehkha min zirtir ve a, “Mama/ Mami chu chu nih tum ang che aw!” emaw “ Zir tang tang la hna tha tak ila thawk dawn nia” tih tal fuihna hi chu nu leh pa mai ni lo, thenawm leh laina hnai ten he kan khualzin kawngah hian min fuih theuh tawhin ka ring! Nih ka lo tum ve thin leh ka tui ve na thin te ka han tar lang ang a nangmah lo inchhut ve chhin teh!
My 1st Passion: Sikula ka ngainat hmasak ber chu ‘NINHLEI’ kha niin ka hria. Hrem vawi khat tal tuar loa karkhat tluan chhuah kha ka nei khat khawp mai. Home work tih loh nen! Beng pawh, bungbua beng pawh, banga uai tih leh lungput kha ka hlawh chhuak zing khawp mai!
My 1st Ambition: Football khel thiam nih kha ka va chak thin tak em! Kan thenawmpa ‘U Tawntea’ (MAP a khela a lut ta) ka ngaihsan thin zia kha! Tum pawh ka tum ve nasa. Mahse, ka pa duhtak kha a han strict thei em em khawp a, inrinni cheng 15 entry fee one day a Cup inchuh tur te kha hre ranin thing pu turin min han tir ta tlat mai thin a. A lian leh a te a sawi lo a. Kan in atanga thing ruk theihna hnai ber chu km 2 vel a hla a ni a. Tlan tang tangin ram lam ka pana, tlan zawhpui theih tawh thing puin ka tlan hawng leh tang tang a. Vanneiha pawl te an lo la chak chuan semi final atangte kha chuan ka khel ve hman ta thin.
Tin, Sunday tlaia Biakin thlang sikul II kawta bang pet per awih a inkhelh te kha! Ke zungpui tin chhuih thla phungin ka tel ve ziah bawk. Tum khat chu ka scholarship (Vanneih a zarah pawl 5 atang khan Scholarship ka la tluan parh a) ka lak ve khan masi thawmhnaw ka duhzawng lei turin min ti a. Ball Boot leh Sine Guard ka lei ta a. Ka haw chu ka pa lecture a thui duh khawp mai!
My 2nd Passion: Lehkha chhiar hi ka nuam tih zawng a ni leh a. Zirlaibu tih loh chu! Ute college zirlaibu a Mizotawng a As You Like It emaw, Sialton Official, Phira Leh Ngurthanpari, Lali tih vel kha ka lo chhiar zo ve thuai thin. (Sialton Official leh Nunna Kawng Thuampuiah tih kha ka mitthlah a la cham reng thin!)
Thianpa awmthei ve tak neih zarah Archies leh Tinkle ka chhiar ve theih phah a. Shikari Shambu leh Supandi phei chu ka la nuihpui reng peih tun thleng hian. Saptawng ka zir ve na a ni a, keini Mizo Medium a zir tan kha chuan JF a Dictionary kha tangkai tak ani.
Mah se, sum neih ve si loh chuan kan khaw library chaurau ve tak chuan chhiar duhzawng a daih ta lo thuai a. Dawrah lah Magazine duh thala lei tur la awm lo vein en! Lehkhabu hmuh awlsam theih ber Cowboy Bu chhiarah ka tlak ta a. Aizawla lehkha ka zir tan kum phei chuan Mission Vengthlang a an library a Sudden a te ho bu kha ka chhiar zo hman vekin ka hria! :D
My 2nd Ambition: Hei zet chu ka Cowboy bu chhiar hrin chhuah a ni. Ka mumang lamah te hian ka lo ding kak leh tha thin a. Kawng kawia meng rum deuh tawh tum phei chuan ka kut hian ka kekawr ipte hi a lo hnaih hman a, ka zungtang hi a lo kak tha thin!
Cowboy ram zawn chhuah a, Sheriff em tlin phak loh pawh a Outlaw bawn turu, phawirang nih kha mang phan in rauthla in a tak ram ka zawng ruai thin!
My 3rd Passion: Aizawla ka lehkha zir kha, inkhawm ta ngai bawk si lo, thian nei bawk si lo chu tih tur dang zawn a lo ngai ta a. Cowboy bu in min hnem zo chiah tawh lo bawk nen. Thil chhe siam/ thil tha siam chhiatah ka ram tang ta a.
Ka la hriat reng chu RO Bawm hi ka nei a. Bawlhhlawh paihna ami pawh ka chhar zel a. Ka hlawhtlinna hmasa ber chu Akai Tape Recorder chhia leh ka pate ate Philips Radio chhia ka modify kual vel a. A tawpah chuan khum hnuaia luhkham a delh beh tir khan AIR a ‘An Lung a Leng Ve Ngei ang’ tih kha a ri chher ve bai bai thin.
Tum khat leh chu electric istiri chhia ka siam a. Kan inluah chep takah khan ka nutei a lo leng a, ka bul thutthlengah chuan a mu zar a. Ka siam ka siam a. A tawpah chuan a puak ta pawp mai a. A bula ka nutei mu chu a sam a kang hmui ta chum chum mai a. A tih chi loh ngei mai.
Ka hlawhchhamna ni a ka hriat tak chu Champhaia kan thenawm ka thianpate Burma Deck Tape lei thar chu a ri a chher deuh a. Kan thiat ve leh pawp mai a. Ka siam zawh meuh chuan rik pawh a ri thei tawh lo.
My 3rd Ambition: Matric ka pass ve ta hlauh mai a. (Hlauh maia ka tihna chhan chu 1st term-ah ka failed a, 2nd term-ah ka SP a, selection ah 3-na ka ni ta hlauh mai a!) Wonderboy a ten an hre chiang ang chu. Govt a kan Vice Principal khan “Hei chu kan pawm dawn em ni?” a tih kha fiamthu nge tun thlengin ka la hre lo!
Science zir ve ta na na na kha chu, 11 kan zir tirh hian kan zirtirtu nu hian ‘Nih tum’ hi min zawt diat diat a. A thenin IAS, IPS, Doctor, Engineer an tih lai khan tlar hnung berah ka thu ve ran a. Ka hun a lo thlen ve chuan “to become a great scientist” kan tih lauh mai a. Introduction tha tak kha ani ringawt. Rei vak lo chhung chu kha sikulah khan ka ‘nick name’ anih phah ta nghe nghe a.
Tun Dinhmunah enge ka nih tak?
Life’s so unpredictable. Kan duh dan leh tum dan ang hi chuan a lo awm theih loh mang e. But I don’t regret, ‘coz midang pawh khan an tum an thelh ve tho! :D
Harsatna hrethiam inti ve khan employed nih kha ka chak ve em em a. 12 ka zirlai phei chuan part time in Future Vision Advertising-ah khan Magnetic Therapy bungrua fakin tie te nen office leh door to door campaign neiin veng hrang hrang ah Naga ho nen ka tei kual ve rak rak tawh a.Naga ka ni ve emaw tiin Ramhlun a Industries' Office ah phei chuan nu pakhat hian,”Heng ho ve ziah lah hi……..” tiin min lo an khum hrep leh nghal a. Mizotawng ka thiamlo der tluan ta ngawt a.
Chhungte phurrit chhawk zangkhai turin sipai nih kha a rem a niang chu! Air Force leh Navy ah ka tling leh ta a. (Navy phei chu ka tum hnih tlinna ). Ka inngaihtuah fe hnuah ‘Join the Navy and See the World’ ka thlang ta a.
Sipai lubawk nih hi ka tan a lo tha aniang e. Ka passion leh ambition ho khi ka kawp thup ta mai. Multi-tasking!!! Football pawh fawren thlengin ka khel tawh a. (International Player!) Silai pawh ka hum run ta fo mai a. Mang lama silai ka lo mut pui thin kha a tak ramah chuan ka din khawngpui zar reng ta fo mai a ni.Khawl siam pawl kherah ka thawk zui ta bawk nen, thil siam chhiat pawh ka ngah tawh khawp mai. Lehkha chhiar pawh hun ka la insiam thei zel a. Amaherawhchu ‘Great Scientist’ erawh ka person ta khawp mai.

My Aim in Life
Thlarau mi tak chu ka ni lo ngei mai a. Khawvel changkanna pawh ka hlat duh bik miah lo a. Officer nih tumin tum thum ka bei a. A tawpah ka tla leh thin a. “Pa lian leh hmeltha” nih hi a lo ngai tak tak anih hi te ka ti ta mai mai a.
'Engkimah Lalpaah chuan lawm fo rawh u' tih leh 'Nang malsawmna ni ang che' tih hian ka nitin nun min kahruai thin a. Khawvel thil te chu kan um ve bawk ang chu... mahse Chung lam remruatna pawmthiam tur leh midangte tan a malsawmna ni thei tura ke pen hi ka tum ber a lo ni ta a ni!
"Mould me and make me to be a better man!"

Jun 18, 2009

Pawng tih

"Enga tinge awmpuite leh zel?"
"Ka pawng tih a nih kha!"
Chuta tang chuan "*****Pawngtiha" an tih phah e an tia lawm!

Tunlai chu hna lamah mood fuh vak loh nen, tlaiah han haw i la, Shiney a Rape Case ringawt mai TV ah a lang a. An awmpuinu kha a lo mut pui ve khanglang a, a lo pawngtih ve ngawt a, a hmeichhia khan min pawngsual e a ti ta sia. Police ten an man ta a. News Channel zawng zawng, abikin Hindi-ho ah phei chuan a nun a chin chhuakin an phawrh leh tan ta phiar phiar mai le.

Police lamin an man ta a. Actor pa nupuiin a rawn tan ve leh ta. Heti tak mai a anpa hmingchhiat lai pawh a media hma a huai tak mai a an pa a rinzia a rawn chhakchhuak piap piap mai hian nupui duhthusam a nih tir teuh hle in ka lo hre leh pek a.

Kan TV ho lah chu an han thleng thui leh tawh khawp a, Pawngsualtu pa chenna Society member te, an housemaid te khaw lam thleng thlengin an luh chilh leh tawh a. Mipui lam lah kan thleng thui. Khai hlum lo rawt pawl te pawh an awm leh tawh. Delhi tlang lama kan hmeichhe lam hotute pawh Mumbai an rawn thleng fel leh tawh a.

A lo pawngsual tak tak nge a lo ti fiam mai mai tih te pawh hriat a chak awm rum rum a lawm maw le.

Chakai te pawh ka ang deuh e tun lai chu... khawmualah chuan ka kal bai auh auh mai a lawm! Ka awl lutuka awm ngaihna ka hre lo a. Ka thatchhiat phah vek a lawm. Min lo hrethiam teh u! Kan tiam post ka net book siam tir an lo Reboot peka, ka lo Back up hman si lo a ka chan ta vek a nih kha.

Taimakna mum min chawh tur hria in awm mial lo maw?

Jun 3, 2009

First Day

(He post hi ka thuziak tlawm tak te min lo hlut saka, min lo chhiar sak ve tu te tan ni rawh se.... Lak chhuah, entawn, carbon emaw hmanga hmun danga hmuh leh chi a ni hran lo ang!)

Kan khaw lamah ka hawng a, globalization tual an lo chai vut vut laiin ka tu leh faten ka Net Book an lo ti chhe palh hlauh mai a. Kan chhunzawm thei ta lo kha a ni a. Naktukah Samsung ho Engineer in min rawn tlawh dawn a, a siam that ngei ka beisei!

Hun rei tak atang khan khawmual lamah ka awm ve tawh tur thu ka sawi a, ka chak tawh khawp mai a. Hei a takin khawmualah tual ka chai ve ta e!!!

Tuesday zingah Mumbai ka let leh a. Dar 9-ah chuan ka hna thar tur inpeih at in Office ka thleng vang tawh!

First Day.....
Ka thil hmuh hmasak ber chu ka thawhpui tur te kum chu ka va pha lo ve tih kha a nia. Kan va han in senior hleih em em!!! Hei chu fiamthu aniang a ka ti hman a. Mi 40 velah khan ka rual pui ti ila, kum 10 vel tala kei aia upa lo kha zuk awm lo a. *Ka tar ve tawh aniang e*

Introduction te kan han nei zo a, keimah chiah nupui nei lo ka awm avangin ka awmna tur pawh kha min ngaihtuah sak dawn ta a (Pu Kima Aizawl post min ti hre chhuak thut!). Engvang phiang sena he hmun kher kher a min transfer chu le!

Boss in min ko! A chenna bawm ka va lut chu a lo fel khawp mai a. "Russian Motor Specialist i ni em?". Nuih tut pahin, "Ka service record i chhiar lo mi?" kan ti hram a. "Chuan, i hmuh angin hei Electricals hnuaiah i awm dawn a, Mechanical lam chu pathum chauh in awm anga, in hna chu nakinah i la hre chhawm anga. Special Driving Course lam ti hmasa la ka ti a"

"Ka pu, driver ni turin hetah hian min transfer ka hre lo", ka lo ti hman pek a. Boss thar chu sakeibaknei hliam tuar hual beh ang mai hian a rawn meng hman a. Mah se, thiamna lam leh engkima kan pu na na na chu a inbengdai thuai a." Motor khalh turin ka ti hlei nem che, a tul tak thut pawh a trial thei tur in i tan a tangkai zawk ka ring mai a nia" a ti thei ta hram a.

Kha mi zawh atang kha chuan chhun chaw ei thlengin tumahin min be leh ta lo a. Kei pawh chu ngawi rengin ka hawi kual ngat ngat a. Hna pawh chu ka nei lem hlei lo a.

Tlai lamah chuan ka dept. tur HOD chuan, "Garage lamah te zuk en chhin ta che" atia. Ka zuk thlir chu keimahin ka nui ta kiah kiah mai a. Darthlalang ka zawng ruai mai maw le!

Kan Garage ah chuan Tata 407 1 a lo ding ve ran a, amaherawhchu a lo din hual tu te kha a ni ka nuih ti za tu chu! Russian Special Vehicles rothap hmel tak tak sipai motor rawng ang, hmanlai Shakti Man ai pawha hrawl fe fe, ke ruk lai nei kha an lo ding sir khup mai a.

"Khung khu kan pu khan khalh tur khan min ti a maw???"

Ka han inennawn leh a. A seat ah khan han thu ila, wiper ka hmu pha tawk tawk emaw aniang a. Han kamsang dawn i la, a break kha ka tlawh pha leh lo emaw a niang a. Awi ha.... ka tlan thui duh awm mange..... keini 3X3 ho tan hi chuan 100cc bike khalh ve pawhin a hnunga thu tur kan van raih mai a. Kawng sira min lo thlek tu te lah chuan, "Vei lamin nge dinglamin a in rahkhalh ang?" tih vel kha min lo suangtuahpui a.

Ni khatna chu ka hmang zo ve thei ta mai a.

Second Day......
A ni hnihna chu a ni ve deuh zaih tawh ang chu ka ti a. Nilengin tui um 6 ka in hman a, tumahin enge ka tih ve dawn tih min hrilh miah lo.

Taima chu ka ni lo na a, tih tur hisap tur pawh neih loh chu a va han hahthlak ve le! (Tuifinriat lamah kha zawng 24X7 hi a lo awm thei tak tak a!)

Ti vel hi a ni ka tunlai khawvel chu....

***** Mizoram ka cham chhung zawng a ka rilru luah tu deuh zinga pakhat chauh ka han share pui leh lawk teh ang che u....

Mizorama kan Minister fel tak mai chu vai contractor hlun tak pakhat hian thei rah i lo a ina dah pahin cheng nuai nga (5Laks) a kal san a. He minister hi a fel em avang leh eirukna do tlat tu a nih avangin a hriatchhuah veleh pawisa pelet tur hian mi a tir ta nghal a. Hetih lai hian witness tha tak tak, Mizoram a senior doctor pahnih bakah Mizoram kohhran lianber hruaitu lu chu kan Minister inah hian an leng a. A va ropui em, chanchinbu leh TV ah te an chhuah in an puang chuai chuai a, kan Minister a ngei pawh TV ah te kawmin "Eirukna chu an hotupa ho a PHORO an tum thu" a sawi nghe nghe a. A va han ropui tak em!!! Mipuite khan kan va han fak em?

Ti zawng hian ka lo ngaihtuah leh tlat pek a.........

"Kan minister fel tak hian pawisa hi pek kir leh tum ta lo se, hriatpuitu thatak tak a nei bawk si a. Chu aiah chuan hepa, vai, tham tumtu pa hi man tir ta zawk se emaw, FIR theh lutin leh he Contractor-pa Licence hi hlih sak nghal se la. Mipuite tana thawktu tham tum tu chuan a phu thlawtin ka hria a. Tin, a zung chawpa 'PHO RO' nan chuan hmanraw tangkai zawk a nih ka lo ring ve mai mai thin a. Engtin nge an tih zui phei chu ka hre ta law? Amaherawh chu, chanchinbu leh News lamah te ka ngaihthlak si loh avang erawh chuan ka cham chhung zawngin ka rilru ah a cham reng a!!!!" *********************

Apr 21, 2009

Globalisation leh Mizote - The Prologue

THE PROLOGUE
Feudalism a tlu chhia a, French Revolution in "Liberty, Equality and Fraternity" min rawn sih hmuh a. American War of Independence in min han thawng harh a. Kum zabi 19 laihawl a pelh meuh chuan India ram pawhin min awptute um chhuah kan tum a. Kan harh tak tak ta. Social Reform mai piah lamah hma kan la tan ta!

Indian National Congress a rawn piang a, Kum zabi 20-na kan chuan kai meuh chuan Congress pawh Moderates leh Extremists (Bal Pal Lal kha I la hria em?) an in thliar tan a. Indopui Pakhatna a rawn chhuak ta tlat mai! Indopui a zawh meuh chuan khawvel hmel a in her dang lam a. Russian Revolution in min deng a. Communist Idea in India ram a rawn thleng. Chutih lai mekin MK Gandhi a pawh South Africa atangin a rawn haw!

Hetih mek lai hian India ramah Militant Nationalism a rawn piang a. Chandra Sekhar Azad te leh Bhagat Singh a te martar dan chu kan hriat kha! America ramah tampui a thleng kan ti dawn nge, the Great Depression in a rawn tlak buak ta tlat mai! Market a han tlu chhe tak tak a, tun thlengin kan economists ho chuan Keynesian Economics an hriat bel hlur hi!

Hitler an a nghawng a rawn len a, khawvel a khur. Kumpinu sawrkar meuh pawhin a khawpui a veng him zo ta lo. Khawchhak lamah Japan a rawn inhro sa. Pearl Harbour abarakhaih thut mai a. Lo theih loh in America a in rawlh ve ta. German ral leh Japan ral a lian zual zel si a. America mangang chuan Einstein a E=mc2 formula a ruai ta tlat mai le! Khawvel in Chain Reaction awm zia chu 6th Aug 1945 ah Hiroshima a hrethiam thar ta thut mai a. Angaihna hre lo ka ang huau a a thlir reng laiin 9th Aug ah Nagasaki ah a han nawn leh sak reuh mai a. Japan ral lian a tawp ta!!! German ral pawh a zal ta!

Heta tang hian keini Mizoten khawvel ke chheh rual a ke pen kan zir ve dan leh kan chheh sual emaw kan rah fuh laite ka thur chhuah tumna a ni ber!
********************************************************************************
"The world is shrinking" an ti maw kha! Yep… the World is Flat!!! Khawvel hi a bial tawh awkawng lo, a phek mek!!!

Khawvel a mum lai chuan "conservative" lutuk mai kha ka nia. Ngaihdan kha ka han nei nghet mai mai thei khawp a, sawhsawn rual a ni lo. Vairam kha hla tak a ni a, sapram phei chu mum pang lehlam ah daih khan a awm a. Han hmuh theih chi kha a ni lo reng reng. Thingtlangpa ngaihdan kha chu sawhsawn kha a lo har reng a ni!

Hun a lo inher dang lam a, a mum pang leh lam ka thlen meuh chuan ka thawl ve ta halh mai a. A lo tight reng theih awkawng lo mai hi a lo nia.

Globalisation hi kan sawi teh fo va, engtiang chiahin nge maw keini Mizote hi min nghawng ve le? Hmasawnna rahbi rah nan kan hmang nge min ti thuanawp tu? Ngaihdan inhmu lo tak tak kan neiin ka ring ngawt a. Ka hmuh dan ka ziak mek a, buai zarah ka zo hlei thei lo a, buai reh veleh chhuah kan tum a niang chu!

Apr 9, 2009

Ka nei ve asin!

Kum hnih dawn ka blog ve ta a, thla khat chuang han update hman thak loh hi chuan lung te pawh a leng ve dawn dawn a lawm le!

Ziah tur ka haih chham em em pawh ani lo, ka hman thlawt lo a ni! Zan dar 10 vel a ban a, Cafe a han luh leh dun dun kha chu a OVER thlak ka ti ve deuh si a. Ka buai tak meuh meuh bawk si a, Laptop an tih ang hi lei ve teh ang ka ti a, ka budget in a daih leh ta si lo a. Net Book-ah ka tlak ta a. Amaherawhchu, ka la hmang hman meuh chuang lo nia! Buai thei vet vet khawp mai.
Kan duh ai erawh chuan a to deuh a, nep erawh har ka ti thung! Laptop pangai pawh a man a in thlau hauh lo a. Mah se, mobility te hi ka duh reuh a. Duh zawng leh ngainat zawng hi a inang lo a niang e. Inkhawm tur erawh chuan kamis sekhawn han cheng 70 man kha ka ha leh mai mai awm si a.
Samsung NC10 (Intel Atom N270, 1.6 GHz,1GB RAM,160GB Storage with Windows XP Home)
Khawvel zet hi chu! A te te hian thil te hi an lo ti thei anih hi ka ti ta a. Ka duhang chu a tih ve theih tho nia! Buai karlakah pawh ka post ve zeuh zeuh thei tawh ang chu. Kan la inhmu leh thuai ang! Hei ka Net Book pawh ka hmang tangkai tan sawt khawp mai!




Feb 26, 2009

Min Thlahtute-Tiau Ral kan hma atangin

Mizo te hian thlah tu te chhui hi kan ching teh chiam lo a. Kan history kan sawi apiang hian chhinlung chhuak kan nih thu hi chu kan sawi lang ve ziah a. Thlahtute han sawi hian mahni PU te ai thui chhui thei hi kan tlem ngawt in ka hria.

Kei pawh ka chhui peih vang ni miah loin, ka pu Tawkthuana taimak zarah min thlahtu ka hriat hlat theih ber atangin ka han tarlang ve mai mai ange.Tunlai chu Chin leh Zo/Zou boruakin min chim nasa bawk a. Zo Bloggers zingah hriatzauna belh tur nei awm ring ran chungin!

Amaherawhchu, TLAU hi Mizo chhuitu te hian chang leh PAWI(H) ah min chhuah a achangin DUHLIAN ah min chhuah a, khawi zawk nge ka nih phei chu ka PROOF thei bik lo!

Ka Pu Tawkthuana min hnutchhhiah angin a chhuih theih tawp atangin bul kan tan ve thung anga. Mak i ti ngawt ang ti ngawt ang tih hla kha i lo sa a nih pawhin mak ka ti lo ang! *GRIN*

Chhui theih hla ber kan thlahtu chu Niluna a ni a. Niluna'n fapa Chelhlova a nei a. Chelhlova'n kan hnam hming putu Tlaua a hring a. Tlaua hian fapa panga a nei a. Bawlchhima, Bualchhuaka, Thlengngana, Vantawla leh Khukhaua te an ni a. An upat dan indawt in ziah ka han tum a mah se, Bualchhuak a thlahte hian Bawlchhima aia upat nih an chuh a ni awm e (Bawlchhim ka nih vang ni lovin)!

Heta tang hian min thlahtu chhuan ka han chhui zui zel teh ang!

Bawlchhima'n Lianhmunga a hringa,
Lianhmunga'n Hleiunga,
Hleiunga'n Hratlala,
Hratlala'n Hlawnthanga,
Hlawnthanga'n Nungthoa,
Nungthoa'n Tawkthuana,
Tawkthuana hian kapa duhtak Lalthangliana,

Tichuan kei ka lo piang ve ta a! Chhuan 13-na(13th Gen) ka nih tak chu{Ka no hi a luck bik riauin ka hria :-)}

Tin, ngaiteh- Chu chuan chu chu a hring a tih bu hi Bible-ah pawh chhiar kan hlawh tak ani a. Mah se kan rinna ti famkimtu ani si. Mahni thlahtute chanchin hre lo leh hnam nunphung theihnghilh mi chu mi bo an lo ti vei nen. Nang teh eng i ngaih ve dan?

Feb 17, 2009

Ka tunlai khawvel (With some Pics)

2009 hi Zoram lamah YMA in zin kumah an puang nge ka hre law! Ni 3 aia rei hmun khata mawng ka hun hman der loh chu a!!!

The giant orange orb slowly faded into the distant horizon.....
(Sunset on Friday the 13th of 2009)

...........leaving behind a trail of vibrant colors.

14 Feb 09 zing dar 2 ah Mumbai lawngchawlh hmunah ka lo kir a. Valentine's Post a ka duan ve uluk taka ka PC a ka typed sa erawh MS Office 07 ah ka lo saved avangin Cafe ah ka hawng thei ta lo a.

Lunch thleng thak ka CRP mut kawm reng a. SMS ka dawng ve tlat!!!

"For those who are single on 14th....


.

..

...

Happy Independence Day!!!"
Keimah in ka khek vak vak tep ani!

Ka CRP mut chhan pakhat ah chuan, Ram Sene leh mene emaw Pink Chaddi ho karah ka tla zep palh ang tih ka hlau deuh a.

Luck loh vang hian kan duhtui lo tihna a ni bik mang si lo a. Hmangaihna kan hrilhfiah dan a danglam mai ani zawk!

Vairam mipui tawt tak karah khan ka lo inzep ve palh ang a, khawimaw lai a dum tliang hlarha nui var tha mai bula din fuh lai hian min rawn nek palh hlauh anga. Chutih lai tak chuan Sene mene ho khan min lo hmu fuh ang a. Anti-PDA Dan BU a Un-Indian Behaviour Section III tlawh chhanin 'Mangalsutra' hi an rawn phawrh ang a. NUPUI ka hawn ve ngawt ang tih ka hlau deuh a ni!

Tlai lamah boruak ka va chhim ve reng reng teh ang tiin ka chhuak a. Lo...!!! Tumah in engmah an hlau lo. Angai te te in an leng siau e.
An hmelah chuan "They can't stop us, because love is on our side baby. We can reach the heavens and touch the sky .................... 'Coz through it all love will always find a way" tih hla kha an sa ni berin ka hria!
Ka zan leng haw kawngah Times Of India ho Arts Festival Open Air Concert ka chhim hawng a. An hot kher mai. Shankar Mahadevan khan "Breathless" tih kha a lo sawisa vel a. Stage eng ri riai hnuaiah a thawk leh thawk loh ka hre lo a, a thei phian!!!
{Ka hriatsual loh chuan The Corrs ho music "Toss the feathers" nen a danglam lo in ka hria! Andrea Corr hi ka duh reuh tak tak a ni eeeee :-) }
Ka tui rei lo. Zanlai a pelh meuh chuan Valentine for the Lone Riders a rawn chhuak hlawl mai a lawm!
Ni te an vei zel a, ka Valentine post erawh ka shelved rih mai teh ang. Hun leh ni ten an liamsan ta si a!

Jan 29, 2009

Tunge ka sum eiru?

(Ka inngaihtuah lungpuam thuta, “Khawnge ka pawisa thawhchhuah ve te kha?”. A tam emaw a tlem emaw kum 8 chhunga ka thawh chhuah ve te kha khawnge a awm zawh tak? Tunge min eiruk sak?
Thla tawp dawnah Bank balance han check ila, digit hnih hnuai lam alo ni a. Assets leh liabilities awm zia hre lo mah i la , “Enge ka tih le?” ti a mahni inzawh a awl khawp mai. Sum lu tih tur reng reng ka nei lo nia.
LIC leh PLI ah policy ka lei ve a. Group insurance subscription leh a tlem thei ang ber (compulsory subscription) Provident Fund-a ka dah ve tih mai loh chu engmah, engmah tak tak ka nei lo thei nia!)
SENT SOME, SAVED SOME!
“Engtiang chiahin nge thlakhat sum hi i hman?” emaw, “Enge retirement plan?” tih zawhna ka dawn chang apianga ka chhanna ‘ever ready’ chu ‘sent some, saved some’ tih hi a ni awlsam et reng mai a.
Nia! Bachelor nih manah chhungte chu ka thawn ve thin bawk a. Mahse a bangte kha khawiah nge? SENT SOME chu a zo fel mai a. SAVED SOME part nen khian han belh khawm ta i la, 50% a tling thei lo reng reng. Phar sawm tih dam ang mai a, a bangte chu khawnge an awm tak? tih mai a awl khawp.
Zu ka in loa, Pub leh discotheque ah ka kal ngai hek loa. Nawmsip ka bawl ka hre hek lo a. Thawmhnaw hakthlak khat aia tam ka neih ka hre ngai hek lo a. Mah se thla a lo tawp hian Bank balance hi NIL a ni hman deuh ziah tho nia!
MONEY MATTERS
Mizote zingah hian ADVISOR hi kan tam a. Damdawi lam a ni emaw, zirna lam ani emaw, hmangaihna lam a ni emaw, dawn sen loh thurawn petu hi kan awm ziah thin ani a.
Amaherawhchu, sum lam alo nih hian kan thurawn hmuh theih chhun chu, “Sum ngainat chu sual tinreng bul ani” tih leh”Sum tello chuan hmangaihna tih vel pawh hi a awm thei lo, Pathian thuawih reng phei chu har tak a ni” ti te hi a ni mai awm e.
Thudik ni ve ve si, inkalh tlat an ni lawi si a. Tin, a hun leh hmun a zir a chhanna diksa tanpui vartu hnai reng an ni bawk!
PLAY IT SAFE
A chunga thurawnte khi en ran chungin sum ngainat loh ka zir a. Sum ngainat loh ka thiam dawn veleh sum tello a ke pen harsat zia in min rawn tlak buak a. Ka thla tin hlawh tih pun ngaihna ka hre si lo. Mite sum chalai vel dan ka thlir ka thllir ta mai a.
Bank savings mai duhtawk loin company dang dai tak tak sum ah tam tak pung thut tur umin sum an dah a. A vannei pawlin kar loah a an sum dah let fe an hmu chhuak reng bawk a. Shree Shoppings, Sagacious, SMS Media etc etc tih ang reng vel te kha! Downline/ Chain system an tia, a inbum theih theih an inbum a. A tawpa chan pawlin uplink ho an mawh chhiat a. Khatiang company tho kha a lo chhuak leh a, an dah ve leh mai bawk a. An rin lawk ang ngeiin thla 6 a lo ral chuan an tlan bosan leh ta thin a. A chang chuan nuih a za thin.
A inti fing pawlin stock market an luh chilh a, a thenin mutual fund an ti! Hrethiam ve chiah lo mah i la mi ti ti leng vel ka lo ngaithla ve kur a. Risk a ken tel avangin ka la tel ve ngam lo cheu a. A zir peih leh taima te chuan an hlawk pui a, a then te erawh chu vawikhat hlawk hluai kha an zawng chhang a, an chan leh teuh thin.
Amaherawhchu, ti teh ang, hetiang a sum khawl mite hian kei ai chuan an nei vek nia. A then an hlawk pui viau a, a hlawkpui lo deuh te pawh khan kei a thla tin lo thlir a eiral ziah ai chuan an nei tlat! Tlem a zawng an lo khawl far nia!
PLAY THE GAME
Rich Dad, Poor Dad- Robert T Kiyosaki's and Sharon L Lechter lehkhabu ka chhiar khan ka rilruah sum ngaihtuahna a rawn tuh a. Stock Market Guide te ka lei ve a, thiante eng eng company emaw a share holders te puihna a zarah a then a zar bakah business jargon mak pui pui chu ka man thiam ve ta thuai a.
Stock Market leh Stock Exchange functions te, SEBI in a regulate dan te chu lehkhabu atang chuan ka hrethiam ve mai a. Company Annual Report endan ka han zir a, Balance sheet leh Profit and loss account endan te, funds and loans, gross block and depreciation tih vel te leh Director’s Report pawimawhzia te pawh ka man ve riai ruai a.
Eng Share nge tha ta ber ang? Fundamental Analysis leh Technical Analysis ka han zir thleng a. Risk Factors leh Returns ka han keu a. Shares mai piah lam a Futures leh Options ka thlen meuh chuan thla khat alo liam a. Ka hriat chian tawh loh dan chu chiang tak ani. Sumdawng tlak hi ka awm tawh lo reng reng.
FINAL DECISION
Kha chen ka ngaihtuah hnu ah pawh rilru ka la siam fel hlei thei der lo nia. Sum ka ngaihtuah a piangin hnuk a ti ulh ziah thin. Mizote zingah lehkha thiam tam tak te hian thu leh ziak in sum leh pai hi min han hrilh fiah teh un! Kan zirna leh thiamna te hian MNC leh eng eng Corp. a manager lian thawhna chauh ni lo a, social service ang a ngaiin thingtlang kil khawr ber thleng turin ziak leh hril in min han hrilh hre teh u! Helam guidance hi nei tha ni ila chuan 'CHIAHPUAM BORUAK' khan khati khawp khan Mizoram a chawkbuaiin ka ring lo!

Jan 16, 2009

Kum tharah Krista nen!

Kum 2009 a lo in her chuak ruai ruai a, Mahni khawlam atangin hnathawhna hmun lam pan a lo ngai a, D' nei miah lo pawh khan thenawmte zawhte ngiau ri tal in in lam ngaih a ti na ve thei tlat nia!.

Kum a thara, thlawhna in kan thlawk thla ve duai duai a, zin chhung rei lo mah se in lam ngaihtuah hman lek lo a min thlen thlak pui kha chu duh aiin chak ka ti deuh mah mah ani! Ti chuan Mizoram Synod Calendar a Misionary Day a lo thlen meuh chuan thlakhat hmalam lawk a an inkah buai nuaih nuaih na, News headlines tun thlenga la luah phah reng na hmun Mumbai ah kan chuang chhuak leh ta hlawl mai a. A va han nuam dangdai thin tak em! Tlangval a pumpa in a, "Ka nu ka ngai" han tih kha a chi tawh chiah mang bawk si lo a. A rukin ka pianna Zoram nuam ka ngai ve veng veng nia!

Tichuan ni khat em pawh cham ta lo chuan mahni hnalamah tiin tuifinriat lamah kan pil bo lehnghal a. Champhai lamah kan BSNL Broadband ve kha a chhe rei bawk sia, blog pawh update hman lek lo in hei kumthara FIRST UPDATE thla chanve hnuah kan thei tawk chauh a ni a. Engtikah tak regu thei ve ang i maw? Kan pachhe kumtiam ang tih pawh ka hlau hlel lo e.

Kumtharah chuan Krista nen! han tih rup mai chu...... Nia, kum kalta te chu a lo ral ta a. Pathian thu awih har ka tihna ber SAWISEL suh sawisela i awm loh nan tih hi niin ka hria! Amaherawh chu min fakpawrhtu zinga pakhatin thudik sawi hi sawisel ni loin faksel kan ti a ti miau a. Fak sel kan chhunzawm turah ngai i la.

Kum tharah chuan Krista hi han ring leh bur phawt mai i la. A ni chuan kan rinna te min tih puitlin sak leh ang a. Zoram lama kan sawrkar thar pawhin Pathian nung chauh beh chhan loin an hnathawhna ah Krista nen ti zel thei se la. Development hi a zuan in a zuang awrh awrh mai turah ka ngai.

Tin, kan awmna lamah ve thung chuan Krista hmangaihna hian min han tuam vel in a dum a var, a meng zim a meng pawng leh hmul lo leh hmul chhupte hian Krista nen han ti thup thei i la chuan Bomb puah kan hlau tawh lo anga, pawisawilo te tawrhna a liam ngei ang!

Middle East buaina leh Obama sawrkar thar te pawh hian kum puanah Krista nen tih han nei mai se la chuan...... kan khawvel hian global warming, green house effect, polar ice caps, forest depletion, oil reserves etc etc te kan hlau leh tawh ngai lo ang a. Hlauhna aiah remna, lungngaihna aiah lawmna, Fakna hlate a dai leh tawh ngai lo ang!

A tawp berah chuan unau duhtak, nang leh kei chuan kumtharah chuan Krista nen ti dun zel ang aw!!!