Mar 11, 2008

Mobile man tlawm ber chi........?

Kan kawmchhakte video bangawng atanga kan bihthlak thin lai chuan fiim a an inbiak te hian a intifing pawl khan, a lem mai mai. Nakina sapho pawhina an la hmuh chhuah tur kha an ti thin sia. Tunah chuan mitinin kan hum ta fur mai chu ani si a. Sapah kan chang ta ni maw?
Mobile hi a tangkai tih chu kan hre teh meuh hlawm mai a. Vawkchaw chhum pawlh tur thlengin lenna a tangin kan in kai hruai thei tawh a nia. Hei vang hi a ni tunah tak hian ka buai em em mai ni! Ka farnu, ka nau nula puitling ve tawh meuhin min rawn dil ve a. A thiante ho pawhin an neih vek tawh thute, hnathawh an neih bik loh zia thleng maiin a rawn sawi a. Ngaihtuah fim hman hlei lo in ka lo aw liam ve mai mai a. Ka han in ngaihtuah chiang a, ka pa thu lo chuan ka lei ngam ta awkawng lo mai a. Kan thiannu in," In ka han haw a, ka naute pawhin mobile an lo nei vek tawh mai a, ka ngaituahna hria ni awm tak maiin min kai hranga, ka pa thinrim a dam deuh tawh a, sawilan kher a tul tawh lo; mifate sawisel thei pawh kan nih tawh loh hi!" a tih kha ka hre chhuak zawk mai a.
Ka pa ngaihdan tur chu hresa deuh tho mah i la, amah rawn lo chuan thu ka ti tlu ngam ta lo a. Rin lawk ang ngei mai khan ka pa chuan, "BA lai zir ve tawh in hna pawh zawng chuang bawk si lo, awm mai mai a thiante nen a min lo nghak rawh tih nan mai mai a ni. Landline bill pawh kan pek hleih theih loh hi" a rawn ti ta mai a. Ka nau hmel tur ka han ngaihtuah a, ka lo tiam tawh sia. Ka pa hnenah chuan, a tangkai lo zawng a Mizorama an hman tangkai zia te, MMS bawlhhlawh tak tak a tam zia te, SMS an chhawr tangkai thiam dan te leh zan tairek thleng a kutzungpui an hmeh thianziate, zing a tlaizet a tum bur a an thawh chhan tlangpui chu zanlama an ck puite fuh loh thin vang anih thute chu hrilh ka tum miah lo. Amaherawhchu a mah B pawl pass ngaihtuah phak tawk, Mizopa rilru diktak mai khan, " BPL leh Ni 100 inhlawh(NREGS) tura chhuak mobile leklang vu vu, zak chuang miah si lo, hnam kal sual lak lawh kan nih hi. Ka ngaihdan chuan tuna kan chhungkaw dinhmunah kan la phak lo" tiin min hrilh ta a. Lo hau miah lo tur a intiam tirin,"Ka lo hrilh fiah ange," tiin ka mahgtha ta a.
Engtin nge ni ta ang? Ka nau ka lo tiam ve tawh si. Ka han ngaihtuah nawn leh thin a. Ka pa thusawi dik ka ti bawk si. Mah se ka nau ka thiamlo thei bawk si lo. Kei pawh ni ve ta i la rual awh chu ka ti na ngawt ang. Ani ai chuan ka ti na ngei ang. Kha leh chen mobile hi ka hum ve tawh a. Vawi khat mah a awh thu hi min la hrilh ngai lo a. Nia, BA dropped out a ni ve mai a. Hna pawh a thawk lo ngei mai. KTP ah theihtawpin a inhmang ve a. Khawi ilo kalnaah leh thiante zingah a inkiltawih phah ang tih ka hlau bawk si. Aman to pawh ngen ngam loin aman tlawm ber chi min la rawn chah vei nen. Chu kher kher chu aman ka neih loh pawhin ka puk tal ang tih awm hi ani a mah se, kawng leh lamah nu leh pa ka la nei ve si a. Last christmas khan ka handset hman lai ka u ka pe a, chutah pawh engmah a sawi lo kha a ni a, a lo awt ru ve reng dawn si a. Aman lah a tlawm tawh si a. Ka mobile lei hmasak ber chu Samsung a hnung pawl, antenna awm kha a nia, Rs 8000/- ngatin. Tichuan colour, camera, infra red, FM, MP3 Player, Bluetooth, smart phone etc... Kei chuan ka mamawh ngei mai. Ram pawnah ka la awmzui bawk nen. Mah se, ka nau hian a mamawh ve em? A thiante ho hian an mamawh ve chiah em? Nge sum an ngah ve hrim hrim. Anni ho lo pawh, thalai tam zawk handset changkang tak tak te hian an mamawh chiah em le? An handset man hi kum khatah an thawk chhuak ang em? Heng zawng zawng ka han ngaihtuah hian ka nau pawh hian eng ni lo mahsela a phu ve in ka hre bawk si a. Nang enge i ngaih ve dan? Zanin hian a la hun rih loh thu ka hrilh dawn chu a nia, engtin tak hrilh ang i maw.....!

Mar 5, 2008

ZORAM NI

Vawiin ni kha India Sipaiin kum 1966 5 March a kan Zawlkhawpui Fighter hmanga a bomb chiam champha ni in Mizo Zirlai Pawlte chuan 'Zoram Ni" ah an puang a. Kum 42 zet hnuah Zofate kan thang harh tihna nge ni dawn a, sawrkar dinglai te leh kan MZP te hi an inzawl riau zawk te ka lo ti ve mai mai a. Hmanah pawh kan pawlitik khel ho te nen a tangkawpin Zirlai Pawl(?) ten Pachhunga College Library an hal chiam tawh an tih kha. Kan chhiar ve hman hma in kan Mizo kutchhuak hmasa a riral zo ta vek a nih kha.
"Hawh u kan fin hma a thil thleng kha chu i kaitho tawh lo ang u", tih hi ka lo mang phan a. Chuti lo zawng, Mautam lai ni bawk nen. Hel kan hnaih leh palh hlauh dah ange (Mautam hmasa vanga helta leh kan CM in vauchher na kha i theihnghilh ka ring lo). Kan unaute chhuanchham a an awm kha. Ani lo zawng a a kal vaih chuan silai man a tlawm tawh si a. Chu ai a tlawm zawk leh hlauhawm zawk Zu chhe zuar leh dawmdawi ruih theih zuar ru ah te an in let dial palh ange. Enge i ngaih ve dan Ka U?

Tuikuk Ko-ko-Komando!

He pa zet hi chu hrat khawkheng ve tak ani. Zoram khawthlang lam chhuak tih takah Tuikukpa ka ti mai a. A tawng mawh em em khawp a, a kamchhuak erawh a nuihzat thlak thei phian a. Tuanmuang ka hriat tawh ah chuan muang pawl tak ani bawk. Amah chuan Kawrte a in ti a, keiin thawveng ka belh sak thung! Vai ngam chiang ber pawl zing ami ah pawh pakhatna chung hret a ni bawk. Tuikukpa tih vang khan tawngthiam lo emaw i lo ti ngawt ange, Mizopa dik tak a ni a, amaherawhchu a luhlul vang zawk a ni!
An khuaah Routmawi a lawi a, thusawina hun an lo pe ve a. Tuikukpa pa hi inkhawm turin an sawm ve a,"Sawi tur anei ngut dawn emaw ni le!" a lo ti ani awm a. Pafa inchhun fuh tak anni in ka hria. Amah pawh an khuaah a haw ve a, duhsak takin an thenawm nula khan Sunday zingah a thawmhnaw a rawn nawhsak thlap a. Tichuan inkhawm turin an inzui chhuak ta a. Biakin kawngkhar an lut dawn a, thenawm nula in duhsak takin, "Vawiin Tantuah kan ruat che a" an tih mai a(h)! Nula kalpui ngaihsak lek loin bBiakin kawngkhar atangin mual lam panin a tlan haw chiam a ni awm e.
Ka rawn ziah chhan ber nita awm a chu he pa pui roh hian Indian Navy Marine Commando a tre in a trening chhuak. Chu mai bakah Best Physique lawmman a dawng hial, Brown Belt Karate ah a la dawng zui ani awm e. Khatiang khawp a tuan muang kha keini mipuite min venghim tur chuan a ti tha pawl an la ni ta leh nghal a. Ka ngai roh e!