Oct 3, 2007

I SAWI THEIH PAKHAT MAH A AWM LO.

A dik reng! Sawi theih pakhatmah ka neih loh avangin ka han ziak daih mai teh ang. He thu kam hnih khat lek, tawi fel tak mai hian aia upate a ti bei dawng fo thin a(aia naute bulah chuan kan hmang lo tlangpui a). Thawngthei leh tawngkam thiam tak ten a duh ai a thui an chiau pawh a huat thu a la lo hian; tawngkam thiam vak lo pawhin bahlah nuaih a," I..sawi theih... pakhkat..mah a..awm..lo" an tih bah nuaih hi chuan pa thinnel tak pawh hian an hmui an pet an pet tawh mai ani. Hei vang hi nitur ani kan inhumhimna kulhbing sang a' Ka nun hi ka ta ani' tih leh ' Papa Don't preach' tih te Solomon athufing ang mai a kan utawk tur vawn fur ni!
Tlangval pakhat chuan a haktawk chiah ai atlem alian, kekawrte- a kotlang a Jockey tih lang ha in, zing office kal hun lai a Chanmari kawn a traffic police ding tluk zet a khawngin; chhim leh hmar, chhak leh thlangah nge 'chunglam tanpuina ka nghak ang' ti niawm fahran a rilru buai ang mai in a sam a rawn ti phir a. Pakhat dang leh chuan khawchhak chhuak theuh theuh ti niawm tak mai in a rawn inchei 'Arirang' a. A pathumna chuan 'Anni ai chuan ka lak tlak e' ti niawm takin simaat tak leh tho tawlh panal niawm amawi a mawm leh pialin a rawn inkhuih a. Kal pah chuan an in mitsir rilh relh hlawm a. Mah se, nang leh kei hian anni pathum chung thu ah khian 'SAWI THEIH PAKHAT MAH KAN NEI LO'.
Nula pakhat ve thung chu ahmel en reng reng pawh hian 'Khuanu pawhin hei aia tha chuan chei leh ngaihna a hre tawh lo ang' tih hial a mawi leh nalh sa ni chung hian, a hming chauhin- hmalam bawm hnih khuh hlau si, khuh loh hlau siin kawrhma kak thui ( nge zau kan ti dawn) a rawn inbel a. Pakhat daang leh chuan jeans pawl chunga kekawrte sendang lantir hram tum a fual leh ' hei chu a phelh turin midang rawih a ngai ang a' tih hial amawi a tawtin a mawng fual tha hnelh hnawlh chu a rawn hnuhchhuah pui a. A thiannu chuan a laite, a hnarte leh a leite chu bengbeh a rawn beh tir bawk a. An kawmchhak a naupang Sunday Sikul zirtirtu nula fel tak chuan sam, dar vaw hnap a sei chu rawn thlahin puan a rawn bih chhuak a. Mah se, anni thenawm khawvengah hian nang leh kei hian 'SAWI THEIH PAKHATMAH KAN NEI LO'.
A mak e! ti teh ang. Kum za kristianna kan lawm hnu thangkhat zet lian hnu ah pawh Thianghlimi'n zu a zuar ru a, Piangthara'n a bat ral sak a. Zonunmawii Dumka val nen an tlan dun a. Vanlalfelfamkima eiruk nasat zia tapchhak zawlah kan khel kan khel a. Nilai zan ahan thleng a, a eiru hnem hnem khan Nilai zan thupui an hawng hnem leh sia. 'Thenawmte do aiin khawsarih do a thlanawm zawk' ti a min thlah chhawng tu te hian 'i in en mai mai ang u' an tihna a nih ka ring chiah lo a. Chawngbawla te, Taitesena te leh Khuangchera te kha an sa kah tam lam ai chuan mi tan a an inpek zia kha a nih kha thawnthuah kan zir thin ni! Khawsarih pawh do lo i la, thenawmte pawh do lo i la, hawh u i in en chiang ang u! Mizo nih hi Kristian nih na ania. Kristian nih hi Mizo nihna a ni lo. Kan pipu nun kha kan kristianna nen hian a inmil em em tawpin kei chuan ka hria. Kan pian leh murna ah chiang i la bula mite nen hian kan in melh relh relh lo tawp ang.
Tichuan 'SAWI THEIH PAKHATMAH NEI LO' ti tawh lo in 'SAWI TUR PAKHATMAH NEI LO' tiin kan la in chhang dawn nia.

1 comment:

  1. Kava lo thlau duai duai che em!!!Tiang reng hian ilo ziak thei ang tih pawh kalo hre hleinem..

    ReplyDelete