Sep 27, 2007

Mumbai Taxi kan risk a!

Nizan chu thianpa Kartuun-lawma nen, 'khawnge i hawi harh teh ang' tiin Worli lamah thianpa Rinawmtakalentlattuma a hnen kan leng phei a. Tluang tak chuan kan thleng phei ve mai a. Kan ti ti ho nak nak a, chaw ei turin kan chhuak ta a, Ganesh a an lo paih zan a ni si a, dawr tin mai hi an lo in khar thuap a. Atawpah chuan Chinese Chicken Specialist Restaurant ah kan lut ta a. An vai pathian paih ni a nih vang ni ngei tur kha a ni, kan han luck lo em em khawp a(Ka luck thin e ka tihna chu ani lo a). Vawi thum ngawt mai chu order ka dawng a, waiter amaw min lo ti khang kang hlawm a. Ka thin arim tawh lutuk. Engmah dang kha an lo nei si lo a. Tv MBA a duh awm chhun( adang a awm miau si lo a) Rice Fried Rice(?) kan ei ta hlawm a. Kan let chho leh kha dar tlem te chauh a lo ni tep tawh si a. Hawn zai kan rel ta a.
Rel in Church Gate thleng kan phei a. En mang hlei lo in Taxi kan han haiar mai a. Kan tum ram kan han thleng chu pawisa reng reng hi ka lo ak ta lo a. Thianpa lah chuan a lo paipawn mai bik si lo. Zan dar khat velah kan han hawi mangang tak tak mai a. Kan han in dap ngial thin, ka nei si lo. Taxi khalhtupa chu kan leh hawi tir lawk a, ATM lam panin kan kir leh ta a. Vanduai a siam in ka sum neih ve chhun la awm tur a ka ngai kha a lo awm leh ta pek lo a. Kan hawi a dun reng tawh mai a. Mut chu chhuak tawh lo tak ani. Hmanni a ka rawn post ka mobile thar lei ve kha.... ka chhuak hman lo in vaipa ATM ka ken tir a, tlem a zawng ka lo ba ange ka ti kha, a lo la kuit hi lo niin. Ala bang la awm ve chhun lah chu midang ka lo puktir leh si. Khang zawng zawng kan han chhut sual mai kha chu zan hi areh lo chiang khawp mai.Ka sawi thui lo mai ang e. A tawpah chuan kan han in dap nawn leh a, thianpa Kartuunlawma'n a thir tlem a rawn phawrh kan han chhiar a a la daih lo. Ka han in dap nawn leh a, ka wallet kar a tang chuan a thir dang a rawn tla leh ta. Tichuan DULI a daih loin kan insawi rem thei ta a. Vaipa pawh a lo then ha mai a lawm!

Sep 25, 2007

Mobile thar ka nei ve a!


Mobile thar han ti teh vak i la, mi ta hlui tho chu a nia. Sekhenhan kan ti em ni kha(h) Mizo tawngin. He he!!! Thianpa Kartuun lawma'n intithei min ti lutuk a, ka rawn intithei leh zual ani e.
Ih mawm ka mobile tharah chuan thla te a lak theih a, video camera pawh a awm. Hla te pawh a zaitir theih a. An zai thiam ve lutuk. Khawih rak nuam ka ti hle a. Ih.... a te in a pan em em bawk a.Hman a kan radio, three band, battery seh sawih leh rubber a tawnkhawm, Pachuau lu tiat zet a lian ai khan a tha deih zawk a sin.Thil lah chu a leng hnem em em khawp a, vai in lem film pawh a vaiin in a leng. Calendar pah a awm a, Mizoram Calender, burma thingzai sawm zawmkhawm tiat zet ai khan a rawng pawh a mawi a , a rawng pawh ala thlak theih zui lehnghal.Sawi tawh lo mai ang a thui dawn e mai. a leh pekah chuan thianpa Kartuun lawm a hmel pawh in lo hmu thei tawh ang chu!

T20 ah Cricket a lawm maw an lo khleh le!


Twenty twenty (T20) han tih chuan lehkha den hming te pawh a ang deuh in ka hria. Cricket hi vai ho zinga awm manah ka en ve ta zauh zauh a, rei ka lo ti thin lutuk a, mah se he T20 version te hi en a nuam tawk reuh khawp mai.Tun tum chu cricket kan lawm chhan pawh tlem chuan a zia deuhin ka hria. Chak lo reng team tan kha a na ve si a, a hahthlak thei lutuk a. Senior player leh Coach tello a World Cup kan la thei hi an fak zawm khawpin ka hria.

India ram a kan chin, tha lo deuh mai, tar ho tello a thalaite che thei lo ang a ngaihna hi an rawn thaichhia in ka lo hria a.Tin, cricket khelh laklawh laia Shahrukh a rawn lang kha, mitin mai khan cricket lam ai khan an en duh zawk khan ka lo hria a. 'Pakistan ho pawh khan an buai phah ta ani e' tiin ka bula a vai chuan a lo comment fiamthu a. Kei chuan rang fahran in 'thisen zawmpuite chu' ka lo ti var a. A nui tawi khawp mai.

Sep 24, 2007

Indian Idol 3 a zo leh ta!


Hui ham.... huna kal zel a, Indian Idol pawh 3 lai kan nei ta. Mizo te hian Idol engzat nge kan neih ve tawh ang aw! Mipui heti zozai mai zinga IDOL pathum chauh neih chu(h)! Tun tum chu a nuam ve deuh.'Gaon wala' pahnihte final an thleng a. Vai ho min tih dan takah. Mizo tel lo mah se vai ho zingah hmarchhak lamah te pawh India a la awm e... tih an rawn pholang chhiang hle mai.An zai thiam leh thiam loh lam ka lo care ve lo a, Javed Akhtar a remarks khan khawchhak mite nih ati nuam a. Ka han thai lang ve mai mai a ni.

Mah se thil pakhat ka sawi hmaih loh tur chu maw... zai thiam an inzai ziak nge ni a, a kut hlei hlei hnam an chak mai tih erawh chu chhut peih te tan a chhut chi niin ka hria. Tan lam nei ran vekin kut kan ti hlei theuh a, chuan a tantu kuthlei nei tam tam kha an chak ta mai niin ka hria.

Sep 21, 2007

Buai sawmsarih pasarih-na

Thenawmpa phei chuan min be duh tawh lo. A mak ngei mai, ka pian a hnu lama hna ka la thawh nasat ber tum ani awm e. Sailor nih manah tunkar phei chu Arabian sea lamah ka rui vak vak mai a, a thlawn a ruih ah chuan a man hla lo ber mai awm e. Vizag lam a tangin "Thianpa, i ti sei thei ltk" tih ngenna shout box-ah ka lo hmu e. Lo chhiar zawh kher tur tihna ani lo a a nia. Ka ziahsa pawh ka post hlei thei si lo a. Ka thiam loh ani. Zan dar 12 a dinner han ei zak zak tawh hi chuan mu leh mal hi engtihna nge pawh kan hre thei tawh lo a ni e.
Kar leh lam a tang chuan regu ve tawh ang tihi ka tiam e. Thianpa Kartuun lawma hmingin!

Sep 6, 2007

Van kal kawng zawhin!

Van kal sialte, vankal cup la tih te hi chu kan hre furin ka ring a. Kei pawh van kal kawng zawhin vairampur atanga lungleng tak a ka haw ve chu kar hnih ngawt mai kal kawngah ka inbengberek a. Kum tam liam ta chu a ni lo, mah se kum sang bi thar a ka pianna Zoram nuam panna kawng, kum khat zet rawlthar vairampur awm ve, lungleng ve tawh tak haw kawng anih avangin ziah loh chi ah ka ngai lo ani.
Aizawl pawh pel reng reng lo khan kum sang bi tharah khan India ram hmun hrang hrang - Orissa nipui tuar zoin, Vizag(AP) ah favang awllen ka hmang leh a, chumi hnuah Lonavla/ Khandala(MH) ah thlasik ka intuam hlawm leh a. Kum 2002 March thlaah chuan Cochin(Kerala) ah min transfer ta a. Zoram ngaih chu na ve tak ani. Min ngaizawng lem lo 'biangnoi' te kha ka ngai em em tawh mai a. D' nei lem lo khan
Aw kar a hla,
Duhlai mi u........... kan ti ve vawng vawng tawh mai a. Chhungte hnenah 'in dam tha em?', ' ngaihtuah ka ngai lo ania' tiin lunglen zahzelah biakhlatna kan hmang sek tawh mai kha ani a.
August thla ahan her a, chawlh ka hmu ve ta hlawl mai a. Ka neih chhun ang ang a ka bazar hnu chuan August ni 11 tlai dar 5:30-ah Ernakulam Jn ah Cochin-Guwahati Express-ah ka thu ve ta vang a. Rel a ni thum zet kan rik chhoh boh boh hnu chuan ni 14 tlaiah Guwahati ka thleng ve ta hram a. Indian Stupid Time(IST) zet hi chu aw! Chhun dar 11(a hun dik tak) ah chuan thleng hi ila ka haw kawng ka chhunzawm ve hman tur hi ania. Mah se helho in min bandh hnan ta sia, tui lo zetin Hotel Vandana ah zan ka riak ta a. A tuk Independence Day ani a, tlai lamah chuan bandh atawp ang an ti a. Mizoram House lamah ka phei a, haw chak ve tak tak dang 7 lai ka va hmu a. Doctor-te, sipai chhuti haw tur te leh missionary haw tr te kan ni nawk a.
NI 15 tlai a lo ni a, bandh a tawp mai loh avangin sumo kan hire a, kal luih zai kan rel ta a. Guwahati kan pelh fel hma ni Meghalaya lamah bandh nei nei ve leh tih kan hre ta a. Mah se kan driver huai zarah leh keini hoin a in thlen kan chak tawh a zarah kan kal lui ta hram a. Thaw dep depin zanlai pelh ah Shillong kan lut a, kan driver-in ' ahlauhawm tawh lo e' atih zarah ka muhil ta a. Zing chaw Vairengte ah kan ei a. Vawksa thau ei duhlo in ti thin khan hnar ngul kham vek khawpin kan ei mai a(h)! Nuam tak ani. Chaw kan ei kham chauh a, ' Rengtekawnah lei amin, a kal tlang theih loh' an rawn ti. ' kan Highway neih ve chu(h)!' tih mai a awl tawh khawp mai.
Leimin chu kan va thleng hram a, a tlang mai hmel loh avangin Bilkhawthlir lamah kan let leh a. Mah se kan sipai chhuti te pahnih chu an bungrua an la lawk a, ke in tlang an hel ta niin ka hria. Ka tum ve hma hma in chhunglam in ' vangvat a tam lutuk' a rawn ti a. Rang mangkheng in motorah ka thu lut leh ta a.Zanah nuho chu miinah an riak a. Mipa pahnih la bang te chu motor-ah kan riak ta a.
August ni 17 a ni a, ka haw kawng ni 7-na chiah a ni. Zing ka han harh chu Sumo seat lai a mu khan min lo thawhsan daih mai a. Kan motor dinna chu a lo ramhnuai ta si a. Ka tho a hman tep a. Mah se, front seat a thu pahnihte chuan mak tih hmel tak a an chunglam darthlalangah chuan min lo thlir reng a vang chuan ka muhil(?) tha leh ta a. Ni hnih dang kan nghak leh a, ni 19 tlaiah motor-te chu a tlang thei ta a. Kawi nawk nawk chungin an liam zel a. Kan hun a thleng ve ta! Kei chuan tlawmngaih chhuahin, motor-in rit ati ang tih hlauh vang in ke ngatin ral lehlam ka lo va kai san a. A zanah chuan Aizawl kan lut ta hram a.
Ni 8 leh zan 9 kan thang hnuin Zawlkhawpui ka thleng ta a. Mah se, Zokhkawpui pan ka la ngai si a. Seling chhakah (eng bus nge ni ta ka hre lo) kawng min in a lo liam pui ta daih mai leh nghal a. Zawlkhawpuiah chuan kawng tlang hun nghakin ka ute bulah ka cham ta a. Lungleng vak tawh lo hian ka zan thil lei hawng ka zai rut rut a. a tuk zingah kan thenawm nu in kan u hnenah, "In mikhualpa hi mi a ang vak lo a mi?" a lo ti hi a ni awm a. Kum nga zet lehkha zir a inthenawm kan nih hnua hnunglam a tang a khatia in tih chu ka lungawi lo ve khawp mai.
Ni 3 zet ka nghah hnu in, a talng mai dawn lo an tih a vangin ke a tlang hel huam in ka haw kawng ka chhunzawm leh ta a.Vanneihthlak takin Assam Rifle ho ration thiarin (vai tawng sipel bauh bauh theih ve tawh zarah!) ka tawmhnaw te min khai kai sak ta hlauh mai a. Berh phungin mual lehlamah Sumo-ah bawk ka chuang leh ta a. Ti chuan tluang takin ni 12 leh hnuah chuan Zokhawpui chu behliang mun hun velah ka thleng ta a.
Suangtuahna a'biangnoi' awzawng khan min lo hmuak lo a. Thiante ho kekawrte lang fual fahran mai kekawr ha in, sam kawkalh nuaih a chunglam thlir nen min lo hmuak ta zawk a. Chutia in lam pan a kan kal lai chuan Zokawpuiah vairual hi kan tawk ta tlat mai a. Thiante chuan, "Super market tur satu te an nih hi" an ti mai a. Ka rilru te tein 'thalaiten hnathawh tur kan indaihloh(?) laiin kan super market sa tur in vai ngalfim a ni maw...' ka ti vawng vawng a. Tichuan vawksa rep a feren antam thlak leh tinreng bai, ka nu siam ngei mai chuan zanriah kan kil ho ta a.